නිමිත්ත
අවුරුදු කාලයේ දවසක මම රෑ වැඩ ඇරිලා ගෙදර එන්න පිටත් වුනා . ටොරොන්ටෝවේ සී එන් කුළුණ මුදුනින් හරි ලස්සනට අඩ හදක් පායලා තිබුනා . මට මගේ පුංචි කාලේ අම්මලාගේ ගමේ අවුරුදු ගැන මතක් වුනා . ඒ වගේම සිංහල පංතියේ පැවරුමකට දුවට අන්තර්ජාලයෙන් ලංකාවේ අවුරුදු ගැන කල විස්තරය සිහිවුණා . මට හිතුනේ මව්බිමෙන් පිට ඉන්න අපට අවුරුද්ද කොච්චර මග ඇරිලද කියල . මට හිතුනේ ඉක්මණටම අම්මටත් තාත්තාටත් දුරකථන ඇමතුමක් ගන්න ඕන කියලයි .
සීඑන් කුළුනේ මුදුනින් ලාවට සද පායලා
දෙවැට දිගේ එරබදු මල් හිත පතුලේ තෙරපිලා
රබන් සුරල් හඩ වෙනුවට රෙගේ සින්දු කොදුරලා
අවුරුදු ඇත මේ දුරු රට අපේ හිතින් පාවෙලා
කැවුම් කොකිස් රස වෙනුවට කේක් රහට හුරුවෙලා
දිව නැමුනද හිත හැදුණද තවමත් නැහැ තේරිලා
සිරිත් විරිත් හිත ඇතුලේ තවත් සිහින බොදවෙලා
දුවට පුතුට පෙන්වමි මම අන්තර්ජාලයේ සරා
සීඑන් කුළුනේ මුදුනින් ලාවට සද පායලා .......
අවුරුද්දේ සිත දස අත මතක අතර සැරිසරා
තරුමල් අහසේ නැගලා නේක රටා බිහිකලා
අම්මා තාත්තා වෙනුවෙන් යලිත් මතක පිබිදිලා
හෙට උදේම කෝල් එකක් ගන්න හිතට බලකලා
සීඑන් කුළුනේ මුදුනින් ලාවට සද පායලා .......
අනුරුද්ධ වැලිගමගේ
ගීත ගායනය - ශ්‍රී ලාල් අමරජීව ෆොන්සේකා
ගීත ගායනය - ශ්‍රී ලාල් අමරජීව ෆොන්සේකා
සංගීත නිර්මාණය - විශාරද රෝහණ ධර්මකීර්ති
ගීතයේ ශ්‍රව්‍ය දෘශ්‍ය අත්දැකීම විදින්න
නිර්මාණය - ශ්‍රී ලාල් අමරජීව ෆොන්සේකා
https://vimeo.com/264181759
No comments:
Post a Comment