මව් බිමෙන් බැහැරව ශීත හිමරටක වෙසෙන ශ්‍රී ලාංකිකයෙකුගේ මතක මංපෙත ........

Saturday, June 24, 2023

ලෝකයම වෙනස් කල දුම්රිය

 





ලිවර්පූල් වරායේ සිට මැන්චෙස්ටර් නගරයේ පිහිටි කපු සහ අනෙකුත් නිෂ්පාදනයන් කෙරුණු කම්හල් වෙත මුලින් බඩු ප්‍රවාහනය කෙරුනේ අශ්ව රථවලින් සහ යාත්‍රා වලින්. වර්ජන, සීමාකිරීම් හා ඒකාධිකාරී පාලන කටයුතු හින්ද ඒ වෙනුවෙන් කෙරුණු විකල්ප සොයාගැනීමක් විදිහටයි මුලින්ම දුම්රිය මාර්ගයක් ඉදිකිරීම සිදුවෙන්නෙ. 

මේ දුම්රිය  මාර්ගයට සමාන ආදේශක ක්‍රිස්තු පූර්ව 700 රෝම සහ ග්‍රීක යුගවල පටන් ක්‍රියාත්මක වුවත් ඒ කාලයේ යම් ඉදිකල පුවරු (පීලි) මතින් බඩු ප්‍රවාහනය සදහා බලය සැපයුනේ ගොනුන් , අශ්වයන් , බූරුවන් වැනි සතුන් හෝ මිනිසුන් කිහිප දෙනෙක් එකතුවී කල ඇදීම් හෝ තල්ලු කිරීම් මගින්. සාමාන්‍ය පොළොවේ ගෙනියනවාට වඩා පහසුවෙන් වැඩි බරක් ඒ මගින් ගෙනයා හැකි බව මිනිසා දැන සිටියත් ඉතා සීමිත නිෂ්පාදන පරිශ්‍ර සහ වැඩබිම් වලට සීමාවී තිබුණු එවන් බඩු ඇදීම් මහා පරිමාණයට එසවුනේ කාර්මික විප්ලවයට පාර කැපුණු වාෂ්ප එන්ජිම සොයාගැනීමත් සමගයි.

ජෝර්ජ් ස්ටීවන්සන්ගේ මූලිකත්වයෙන් ඉදිවුණු ලිවර්පූල් , මැන්චෙස්ටර් දුම්රිය මාර්ගයේ භාවිතය සදහා සුදුසු දුම්රිය එන්ජින් තෝරාගැනීම සදහා තරඟයක් පැවැත්වුණා. අවසානයේදී එයින් ජයගත්තේ ඔහුගේ පුතා රොබට් ඉදිරිපත් කල රොකට් නම් එන්ජිමයි. එදා ජෝර්ජ් ස්ටීවන්සන් තමන්ගේ දුම්රිය මාර්ගය සදහා යොදා ගත් අඩි 4   අඟල්  8.5 සම්මතය සැකසුනේ එදා තිබුණු අශ්ව රථවල රෝද පරිමාණයට අනුව බවත් ඒ අගය අතීතයේදී රෝම යුධ අශ්ව රථවලින් පැවත ආවක් බවත් කියැවෙනවා.අදත් ලෝකයේ බොහෝ රටවල සාමාන්‍ය දුම්රිය මාර්ගයක පරතරය වන එය හැදින්වෙන්නේ සම්මත දුම්රිය පීලි පරතරය ( Standard Gauge) හැටියටයි. ඊට වඩා අඩු ඒවා පටු ආමාන (Narrow Gauge) දුම්රිය මාර්ග විදිහටත් , වැඩි ඒවා පළල් ආමාන ( Broad Gauge) දුම්රිය මාර්ග විදිහටත් සැලකෙනවා. පළල් ආමාන දුම්රිය මාර්ගයක් ඇති රටක් වන ශ්‍රී ලංකාවේ පීලි දෙකක් අතර පරතරය අඩි 5 අඟල් 6 ක්.

සමහර රටවල් ආරක්ෂක උපක්‍රමයක් ලෙසිනුත් වෙනස් පරතරයන් පාවිච්චි කරන්නේ තවත් රටක සිට තම රටට පහසුවෙන් කල හැකි ආක්‍රමණයන් වලක්වන්නයි. උදාහරණයක් විදිහට රුසියාවේ සිට යුරෝපය දක්වා එන දුම්රිය Belarus වල Brest නගරයේදී දුම්රිය මැදිරි ඔසවා  රෝද සවිකල කොටස වන බොගිය මාරු කරනවා. රුසියාවේ එම උපක්‍රමය දෙවන ලෝක යුද්ධයේදී ජර්මනිය කල රුසියානු ආක්‍රමණය අසාර්ථක වීමට බලපෑ හේතු කිහිපය අතරින් එකක් ලෙස ඉතිහාසගත වූයේ ඒ නිසයි.  

එංගලන්තයෙන් පටන්ගත් ඒ දුම්රිය භාවිතය හින්ද ගංඟා සහ මුහුදු ආශ්‍රිතව තිබුණු නගරවලට සීමාවුණු සංවර්ධනය රට මැද පිහිටි අනෙකුත් නගර වලටත් පැතිර ගියේ ලාභදායි විදිහට පහසුවෙන් කරත්ත ගමනකින් තොරව විශාල බඩු ප්‍රමාණයක් අඩු කාලයකින් වරාය වෙතට සහ රට මැදට ප්‍රවාහනය කරන්න පුළුවන් වුනු හින්දයි. හිරු නොබසින අධිරාජ්‍යය ලෙසින් එකල නම් ලද එංගලන්තයේ යටත් විජිත වලටත් දුම්රිය සේවය පැතිරුනේ ඉන් ලද වාසිය ඒවායේ පාලන කටයුතු වල යෙදුනු නිලධාරීන් දැක තිබුණු හින්දයි. තැනිතලා, කාන්තාර , වනාන්තර පසු කරමින් සියළු මහාද්වීප වල අස්සක් මුල්ලක් නෑර ජාලගත වුනු දුම්රිය මාර්ග එදා වගේම අදත් කරන්නේ විශාල කාර්යභාරයක්. ඉදිකිරීම් කටයුතු අසීරු උස් කදු ප්‍රදේශ සදහා යොදාගැනුණු පළලින් අඩු පටු ආමාන දුම්රිය මං රැසක් පසු කාලීනව ආදේශක නිසා ඉවත් කෙරුණත්  අදත් සංරක්ෂකාගාර වල ඒවායේ කොටස් දකින්න පුළුවන්. ලංකාවේ කැළණිවැලි සහ නානුඔය සිට රාගල දක්වා තිබී ඉවත්කළ මාර්ගය ඊට නිදසුන්.

මුලින් බඩු ප්‍රවාහනය සදහා මූලිකව බිහිවූ දුම්රිය පසුව මගී ප්‍රවාහනය සහ සංචාරක කටයුතු සදහා යෙදවුණත් අදත් ගොඩබිම් භාණ්ඩ ප්‍රවාහනයේ ප්‍රමුඛයා දුම්රියයි. ඒ වගේම රටවල් අතර සහ ඇතුලත නිසි ඒකාබද්ධතා , සංවර්ධන සහ නඩත්තු කටයුතු කලොත්  මේ වනවිට භාණ්ඩ ප්‍රවාහනයට යොදවා තිබෙන ට්‍රක් රථ ප්‍රමාණය හරි අඩකින් අඩු කරන්නට පුළුවන් බව කියැවෙනවා. 

  

මේ වනවිටත් ලෝකය පුරා කිලෝමීටර මිලියන 1.3ක් දිග දුම්රිය මාර්ග තිබෙනවා. පිලිවෙලින් ඇමෙරිකා එක්සත් ජනපදය, රුසියාව, චීනය, ඉන්දියාව, කැනඩාව, ජර්මනිය සහ ප්‍රංශය ඒ අගයේ වැඩි දායකත්වයක් දරනවා. මගී ප්‍රවාහනයට දුම්රිය පිවිසීමත් එක්ක අශ්ව කරත්ත වලින් කෙටි දුරක් යන්නට පුරුදුව සිටි මිනිසුන් සංචාරය සදහා පුරුදු වූ බවත් දුම්රිය සමාගම් හරහා හෝටල් ජාල බිහිවූ බවත් ඉතිහාස තොරතුරු වල තිබෙනවා. තරගකාරී දුම්රිය සේවයක් තිබුණු එංගලන්තයේ තෝමස් කුක් (Thomas cook) ආයතනය ඒ වැඩසටහනේ ඉදිරියෙන්ම සිටියා. ඊට අමතරව ලෝකයේ ප්‍රධාන නගර වලට තරමක් දුරින් උප නගර බිහි වන්නටත් රට මැද දුම්රිය නගර බිහිවන්නටත් මුල් වුනේ දුම්රිය තමයි. 

 


දෙවන ලෝක යුද්ධයත් එක්ක ලෝකයේ වුනු ප්‍රධාන වෙනස්කම් 2 ක් දුම්රියේ ස්වර්ණමය යුගය වෙනස් කරන්නට බලපෑවා. බලශක්ති ප්‍රභවය විදිහට ගල්අඟරු වෙනුවට ඛණිජතෙල් යොදාගනිමින් බිහිවුණු මෝටර් රථය සහ අහස් යානය ඒ දෙකයි. අහස් යානය අඩු කාලයකින් සාගර තරණය කරමින් වැඩි දුරක් මහද්වීපික ගමනාගමනය මිනිසුන්ට හුරු කලා. සුඛෝපබෝගී දෙයක් විදිහට වර්ධනය වෙමින් පැවති මෝටර් රථය හිට්ලර් ගේ බලපෑමෙන් පොදු ජනතාවගේ වාහනයක් බවට පත්වුණා.


සාමාන්‍ය මහාමාර්ග වලට අමතරව වංගු අඩු අධිවේගී මාර්ග ඉදිවීම දුම්රිය මාර්ග ජාලය කෙටි කරන්නට වගේම සමහර දුම්රිය මාර්ග ගණන අඩු කරමින් දුම්රිය වාර ගණන සහ සේවා කප්පාදු කරන්නට හේතුවුණා. දෙවන ලෝක යුධ සමයේ යකඩ  හිඟයත් සමහර මාර්ග වසා දමන්නට හේතු වූ බව කියැවෙතත් මට හිතෙන්නේ පශ්චාත් යුධ සමයේ ඇති වූ ආර්ථික අවපාතය සහ යටත් විජිත බිඳ වැටීමෙන් පසු වෙනස්වූ වරායෙන් අමුද්‍රව්‍ය අපනයනය කල ක්‍රමවේදයේ වෙනස්කම් නිසා  දුම්රිය මගින් ඉපැයූ ආදායම අඩුවීම ඊට හේතුවන්නට ඇති බවයි. 

දුම්රිය නිසා ජනාකීර්ණ වූ ප්‍රධාන නගර මධ්‍යයේ ගමනාගමනය පහසු කරනු වස් සැහැල්ලු දුම්රිය සහ භූගත දුම්රිය ප්‍රවාහන ක්‍රම බිහිවුනේ තවදුරටත් නගර මධ්‍යයේ අළුත් මාර්ග වලට වෙන් කරන්නට ඉඩක් නොතිබුණු හින්දයි. සම්ප්‍රදායික දුම්රියේ සමහර තාක්ෂණික කාරණා වෙනස් කරමින් සැකසුණු ලන්ඩන් ටියුබ්, පැරිස් මෙට්රෝ ඊට උදාහරණ කිහිපයක්.දෙවන ලෝක යුධ සමයේ පටන් අත්හදා බැලීම් කෙරුණු අධිවේගී දුම්රිය යථාර්ථයක් බවට පත්වුණේ 1964 දී ජපානයේ බුලට් දුම්රියත් එක්කයි. මේ වනවිට චීනය, ජපානය සහ යුරෝපයේ බොහෝ රටවල වේගවත් ගමනකට පහසුකම් සලසමින් ඒවා විදුලි වේගයෙන් සංවර්ධනය වෙන්නේ ගුවන් යානයකට හෝ කෝච් බසයකට වඩා සුව පහසුවක් මගීන්ට ලැබෙන හින්දයි. 




මේ සටහන මට ලියන්නට හිතුනේ කුඩා කල පටන් මේ වනතුරුත් දැඩි දුම්රිය ලෝලියෙකු වන මට බලන්නට ලැබුණු වාර්තා වැඩසටහන් මාලාවක් හින්දයි. ඔබත් ඉඩ ලැබුනෝතින් පහතින් දැක්වෙන වැඩසටහන් බැලුවොත් දුම්රිය ලෝකය වෙනස් කල හැටි ඔබටම පැහැදිලිව තේරුම් යාවි.    

අනුරුද්ධ වැලිගමගේ    


https://www.imdb.com/title/tt15151564/

   

        සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.


මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි 

නිර්මාණ එළිය කරාවි. 

Saturday, June 17, 2023

හියුරන් විල අද්දර හිද කාටද අත වනන්නේ !

 



පංච මහා විල් කියල හදුන්වන විල් 5 න් හතරක්ම කැනඩාවේ ඔන්ටාරියෝ පලාතේ ඉන්නා අපට මායිම් වෙනවා .එයින් සුපීරියර් විල තියෙන්නෙ තරමක් දුරින්. ඒත් හියුරන් , ඊරි සහ ඔන්ටාරියෝ විල් ටොරොන්ටෝවේ ඉන්නා අපට පැය 3 ක් හෝ ඊට අඩු කාලයකින් යන්නට පුළුවන් දුරකින් පිහිටා තියෙන හින්ද අපි අද හිතුවා ඒ ගැන කථාකරන්නකියලා. මීට කලින් රූපණ ගමනක මතකය තුලින් ශීත කාලයේ ඔන්ටාරියෝ විල ගැනත්, කැනඩාවේ රොකී කදු කලාපයේ යෝහෝ, ජෑස්පර් සහ බැන්ෆ් වනෝදයාන ගැනත් කථා කරලා තියෙනවා. රූපණ වෙබ් අඩවියට ගිහින් ඔබට ඒ  වැඩසටහන් බලන්න පුළුවන්.



අද අප කථා කරන්න යන්නෙ  ගිම්හානයට හියුරන් විල ආශ්‍රිතව ඔබට යන්නට පුළුවන් තැන් කිහිපයක් ගැන. අඩු මුදලකින් , අඩු මහන්සියකින් ඔබට මේ අවුරුද්දෙ විවේකී දවස්වලට ඒ තැන් වලට යන්න මේ වැඩසටහන උදව්වක් වේවි.



https://rupane.com/2023/06/17/rupane-episode-352-june-17-2023/


මේ වැඩසටහනේ විස්තර සහ දර්ශන යොමුව

ටොබමෝරේ ( Tobermory)

ලෝකයේ ලොකුම මිරිදිය දූපත මැනිටියුලින් දූපත









MS CHI-CHEEMAUN, වාහන සහ මිනිස්සු ගෙනියන පාරුවක්

හියුරන් විල වටේ තියෙන පරිසර සංරක්ෂණ කලාප වල ගිම්හාන කාලයට කදවුරු අත්දැකීමක් ලබන්න ( Camping)

ගිම්හානයේ විවේකී දවසක දවසකට ගිහින් එන්න පුළුවන් වෙරළ තීර කිහිපයක්ම හියුරන් විල වටේ තියෙනවා

Pinery



Grand Bend

Wasaga

Sauble

විශේෂයෙන්ම තරුණ උදවිය ගල් තලාවේ ඉදන් වතුරට පනින එක මෙතැන සුලබ දසුනක් . Killbear Provincial Park

********************************************

ඉදිරිපත් කිරීම  - අනුෂා කිංස්ලි 

සම්පත් දායකත්වය -

අහස් ගව්වෙන් එහා ලෝකය බ්ලොග් රචක අනුරුද්ධ වැලිගමගේ

සංස්කරණය - කවිදු මදරසිංහ සහ පුබුදු වනිගසේකර

සංකල්පය සහ  නිෂ්පාදනය - අනුරුද්ධ වැලිගමගේ

අධ්‍යක්ෂණය - ගොයුම් එරංග 

විධායක නිෂ්පාදනය - වීරා ෆොන්සේකා

Zoom.. තාක්ෂණය ඔස්සේ කෙරුණු පටිගත කිරීමකි.

******************************************************************************

කැනඩාවේ රොකී අසිරිය බලන්නට යෝහෝ ජාතික උද්‍යානයට .....


http://ahasgawwenehalokaya.blogspot.com/2022/09/blog-post_10.html

ග්ලැසියරයක් උඩ අයිස් මත ඇවිද යන්නට ජැස්පර් ජාතික උද්‍යානයට යමු .


http://ahasgawwenehalokaya.blogspot.com/2022/10/blog-post.html

කදවුරු බිම් රැයක් ගෙවන්නට කැනඩාවේ තිබෙන හොදම තැනට යමු .


http://ahasgawwenehalokaya.blogspot.com/2022/11/blog-post.html


සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.




මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි 

නිර්මාණ එළිය කරාවි. 

Saturday, June 10, 2023

වායු දූෂණය , ලැව් ගිනි සහ කැනඩාව

 



සාමාන්‍යයෙන් මම මේ වගේ කාලීන සටහන් ලියන්නෙ අඩුවෙන්. මේ සතියේ පලකරන්නට හිතන් හිටි සටහන අයින් කරලා වෙනස් එකක් එකතු කරන්නයි හිතුවෙ ඒ නිසයි . ටොරොන්ටෝව අවට නගරයක ජීවත්වන මට මේ සතියේ ගෙදරදීත් රැකියාවට ගිය වෙලාවෙදි ටොරොන්ටෝ නගරයේදීත් දකින්නට ලැබුනෙ නුපුරුදු දුම් වලාවක් හින්ද හරිහැටි ඉර එළිය පොලොවට නොවැටුණු බවයි . මාධ්‍යවලින් වගේම ටොරෝන්ටෝවට උතුරින් නගරවල සිට පැමිණෙන අය කිව්වෙ සමහරුන්ට දර පිලිස්සෙන ගද දැනුනා කියලයි. ඒකට හේතුව ලැව්ගිනි හින්ද ඇතිවුණු දුමයි. 

දුර 

මේ දුම සහ වායු දූෂණයට හේතුව ටොරොන්ටෝවේ සිට සෑහෙන දුරකින් ඔන්ටාරියෝ පලාතේ උතුරු කොටසේ සහ කුවිබෙක් පලාතේ ඇතිව තිබෙන ලැව් ගිනි තත්වයයි. උදාහරණ විදිහට දල වශයෙන් ඔන්ටාරියෝ වේ .Wawa ප්‍රදේශයට ටොරොන්ටෝවේ සිට ඇති දුර  කිලෝමීටර් 925 ක් තරම්. එතකොට කුවිබෙක් පලාතේ Clova ප්‍රදේශය තිබෙන්නේ ටොරොන්ටෝවේ ඉදන් කිලෝමීටර් 800 ක් තරම් දුරින්. මේ ලැව් ගිනි නිසා ඇතිවූ දුම් හුළගත් එක්ක පාවෙලා විවිධ පැති  වලට  ගිහින් මේ වෙනකොටත් කැනඩාවේ සහ ඇමෙරිකාවේ මිලියන ගණනාවක ජනතාවකට වායු දූෂණ අවදානමක් ඇතිකර තිබෙනවා .

 ( කරුණාකර නවතම විස්තර සදහා අන්තර්ජාලය පිරික්සන්න )



https://www.canada.ca/en/services/environment/weather.html

https://www.ontario.ca/page/forest-fires

කැනඩාවේ මධ්‍යම රජය සහ මාධ්‍යය නිරන්තරයෙන් අන්තර්ජාලය සහ විවිධ මාධ්‍ය හරහා ජනතාව දැනුවත් කරන අතරේ එළිමහනේ කරන ක්‍රියාකාරකම් සීමා කර තිබෙන්නේ අවදානම අඩු කර ගන්නයි.


පරිමාව 

ලෝකයේ තෙවන විශාලතම වන ගහණය වන හෙක්ටෙයාර් මිලියන 362 ක් තිබෙන කැනඩාවේ මේ අවුරුද්දේ පහුගිය දිනවල විවිධ පලාත්වලින් වාර්තාවූ ලැව්ගිනි නිසා විනාශ වුණු වනයේ විශාලත්වය හෙක්ටෙයාර් මිලියන 3.3 ක් බවයි කියන්නේ . කැනඩා රජය තම සම්පත් වලට අමතරව ඇමෙරිකානු , ඕස්ට්‍රේලියානු සහ නවසීලන්ත ලැව් ගිනි නිවන කණඩායම් සහ සම්පත් යොදාගනිමින් මේ වනවිටත් ඒවා මර්දනය කිරීමේ කටයුතු වල යෙදෙනවා. ඇවිලුණු ලැව් ගින්නක් නිවීම ලේසි වැඩක් නෙවෙයි . ඒ හින්ද බොහෝ විට කරන්නේ ගින්න පැතිර යාම නැවැත්වීමයි. ඊට අමතරව උණුසුම් වෙමින් ඉදිරියේදී ගිනි ගැනීමේ අවදානම ඇති වෙනත් වනාන්තර කොටස් කෙරෙහිත් මේ මෙහෙයුම් වල යෙදෙන පිරිස් නිරන්තර ඇස යොමාගෙන ඉන්නවා. කැනඩා රජයේ ඉල්ලීම අනුව මේ විෂය ප්‍රවීණ සම්පත් ඇති තවත් රටවල් රැසක් ඉදිරියේදී මේ මෙහෙයුම් වලට තම සම්පත් යොදවාවි.

මේ වන විට ගිනි ගනිමින් පවතින ප්‍රදේශ මේ දිගුවෙන් දැනගන්න පුළුවන්.

 https://www.lioapplications.lrc.gov.on.ca/ForestFireInformationMap/index.html?viewer=FFIM.FFIM 


      ලැව් ගිනි ඇතිවන්නේ ඇයි ?

අකුණු , වේගයෙන් පරිසරය උණුසුම් වීම සහ මිනිස් ක්‍රියාකාරකම් නිසා ලැව් ගිනි ඇතිවන අතරේ වැලැක්විය නොහැකි ස්වභාවික හේතු අතරේ වැලැක්විය හැකි මිනිස් ක්‍රියාකාරකම් නිසා සිදුවන ලැව්ගිනි 40% ක තරම් අගයක් ගන්නා හින්ද ඒ සම්බන්ධ දැඩි නීති රීති පනවා තිබෙනවා. ඒ හින්ද වනයේ විවිධ කටයුතු සදහා අවසර ලබා ගන්නා අය ඒ ඒ ආයතන ලබාදෙන උපදෙස් හරිහැටි කියවන එක හොදයි. මෙවර ලැව්ගිනි පැතිරීමට හේතු වී තිබෙන්නේ හදිසියේම වියැළුණු පොලොවේ තිබෙන ගස් දර මෙන් ක්‍රියාකරද්දී ඉහලින් ගමන් ගන්නා අධි පීඩිත උණුසුම් වායුධාරා ඉතාමත්ම උණුසුම් වීම හින්දයි. ඒක හරියට වියලි ලී කැබලි එකට ඇතිල්ලීමෙන් ගින්දර උපද්දවනවා වගේ දෙයක්. ගස් එකට අතුල්ලන්නටත් , ගින්න පතුරවන්නටත් වේගයෙන් හමා යන හුළග සෑහෙන දායකත්වයක් දෙනවා.  

ලැව් ගිනි කලාප 

කැනඩාවේත් වන ගහණය අධික බ්‍රිටිෂ් කොලොම්බියා සහ ඇල්බර්ටා පලාත්වල හැම අවුරුද්දෙම වගේ ලැව් ගිනි ඇතිවෙනවා. ඉන් කිහිපයක්ම මමත් මගේ සංචාර වලදී දැක තිබෙනවා. ගිනි ගන්නා වනය යම් දුරක සිට වගේම දැවී විනාශ වුනු කැලෑ සහ ගුවනින් ලැව් ගිනි නිවන මතක ඒ අතර තිබෙනවා. වරක් අපි යම් ගමනක් යද්දී යන්තමින් ඇවිලෙමින් තිබුණු කැලයක ගින්න පැතිරුණු හින්ද අප ගිය මාර්ගය වසා දැමුනා. අවසානයේදී අපට අමතරව කිලෝමීටර 300 ක් විතර වටයක් ගහලා ආරක්ෂිත විකල්ප මාර්ග වලින් එන්නයි සිදුවුනේ. 

මූලික නීතිය 

කැනඩාවේ පදිංචි කරුවෙකු  හෝ පුරවැසියෙකු විදිහට ලැව්ගිනි ඇතුළුව කිසියම් අසාමානයය සිදුවීමක් දුටුවොත් අදාල අංශ වලට දැනුම් නොදීම වගේම නිසි නීති රීති උපදෙස් පෞද්ගලික හෝ ව්‍යාපාර මට්ටමෙන් පිලි නොපැදීම වගකීම් පැහැර හැරීම් යටතේ දඩුවම් ලැබිය හැකි වරදක්.

ආයෙමත් ඒ කැලෑ වැවෙන්න කොච්චර කල් යනවද ?

ස්වභාවිකව වැවුණු කැලෑ ලැව් ගිනි වලින් විනාශ වුනාම ආයෙමත් ඒවා ඒ තත්වයට පත් නොවෙන්නත් පුළුවන් . සමහරවිට ඒ සදහා අවුරුදු 30 ඉදන් සිය ගණනක් කල්ගත වෙන්නත් පුළුවන්. ඒකට හරි උත්තරයක් නම් නැහැ.

මේ ගිම්හානය 

මේ ලැව් ගිනි හින්ද වන කාලගුණික වෙනස්කම් හින්ද මේ අවුරුද්දෙ කැනඩාවේ මුළු ගිම්හාන කාලයම වෙනස් වෙන්න පුළුවන් . ඒ හින්ද මේ අවුරුද්දෙ කැනඩාවෙ කොහේ ගියත් තොරතුරු වලින් සන්නද්ධ වෙලා දැනුවත් අය කියන උපදෙස් අකුරටම පිලිපදින එක වටිනවා .   


සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි 

නිර්මාණ එළිය කරාවි.