රූප කැමරා කවියාට සුබ උපන් දිනයක්

 

වදනින් කවි ලියන දහසක් දන අතරේ

කැමරාවෙන් ඔබ ලියන කවි සුවිසෙස් මිතුරේ

සම්මානයෙන් පුද ලද කවි පොත් අතරේ

මා මිනිසෙක් ඔබ ගඟක් නම් ඇත වතුරේ

පසළොස්වක සඳ මගේය කියනා ඔබෙ පද

සදුන් අරටුවත් දල්වන ඔබේම හැඩ පද

ගඟ වක්වී ගලනා තැන හිද බලනා සඳ

කවි විතරක් නොවේ ඔබේ රූප ද හැඩ පද

යන අතරේ උරුම අතර ඇති කවි පිය පද

ජීවිත විනිවිද දකිනා කාච ලියන පද

දශක හතක ගමනේදී දැනුමද බෙද බෙද

ගමන් යනෙන ඔබට පතමි සුබ පැතුමන් අද

අනුරුද්ධ වැලිගමගේ ©

2026 ජූලි මස ලන්ඩන් කවි කලාපයේ පලවිය.

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Google images 

                    සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

ජීවිතේ මල් පොතේ සුන්දරම පෙරවදන....

 

නිදිකිරන සදකිරණ , තරු අතර ඉගිමරන 

මතකයේ තවම ඔබ ඉන්නවා 

අඩසදට පෙම්කරන , පිනි මතින් ඇවිදයන 

මතකයේ තවම ඔබ ඉන්නවා 

තෙරපෙනා දුම්රියේ කවුළුවෙන් කවුළුවට 

මගේ ඇස් තවම ඔබ හොයනවා 

පෙම්මුල්ලේ තුරුළුවී හීන් වදනක් දොඩන 

ඔබේ රුව තවම මම හොයනවා 

ජීවිතේ මල් පොතේ , සුන්දරම පෙරවදන 

හදවතේ තවම තව තියෙනවා 

පිටු අතර පෙරලිලා , ජීවිතය ගිලිහිලා 

පසුවදන දැන්  මමම ලියනවා 

අනුරුද්ධ වැලිගමගේ 

2026 ජුනි මස ලන්ඩන් කවි කලාපයේ පලවිය. https://londonkavi.com/poem/27388/

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Google Images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

" පිං" වචනේ හැඩ

 පාට පහක් එකතුකරලා  හැදුව  කොඩිය යට 

පිං කරන්න පොරකන හැටි  මකර තොරණ යට 

සරු  පිළිවෙත් නිසි අයුරින් හිතට ගන්න කොට 

බොරු සෝබන වැඩ මොටදැයි දැනෙනවා කදිමට   

අත හරින්න බැමි බිදින්න  කියන වෙහෙර යට 

පුදනකොටම පොදි බැදගත් ගොඩවල් යමරෙට  

කිසිදා වැඩ ඉවර නොකල  ලොකු පන්සල යට 

බෝඩ් ලෑලි,  නම් පුරවති  පිං යන වදනට 

නිස්කලංක සිතක්  එක්ක සැනසුනු  දවසට 

හුගක් ඇත්තො කියාවි මට , පිස්සුනෙ ඕකට 

සැහැල්ලු බව පුරවාගෙන හිත ඉපිලෙන විට 

භව ගමනට විරාමයකි තරගය නැතිකොට 

අනුරුද්ධ වැලිගමගේ 

2026 මැයි මස ලන්ඩන් කවි කලාපයේ පලවිය

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Pixabay Images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

හිනා පිරුණු ඔබ දකින්න ගතම කලබලයි

 

මන්දාරම් නුවරට වැහි වහින්නට           ළඟයි

හීන පිරුණු ආකාසය හරිම              කළුවරයි

පැයූ ඉදු දුනු සැව්වේ පැහැය               දුක්බරයි

අද නම් ඔබ හමුවන්නේ නැතිම නැති හැඩයි

දුම්බර කදු යාය මත්තෙ කෝච්චිය    හැඩයි

අපේ හිතත් යාකෙරුවේ මැණිකෙලා තමයි

හීත සුළං පොද දැනුනම තුරුළ   උණුහුමයි

තාමත් හිත රිදුම් දෙන්නෙ ඒ       හාද්දමයි

මීදුම් තිර කඩා වැසෙන කදුත්              දුක්බරයි

නිම්න සානු මිටියාවත් හරි              හැගුම්බරයි

පැතුම් පොකුරු පිරෙන හිදෙන මසිත චංචලයි

හිනා පිරුණු ඔබ දකින්න ගතම        කලබලයි

අනුරුද්ධ වැලිගමගේ 

2026 මැයි මස ලන්ඩන් කවි කලාපයේ පලවිය.

https://londonkavi.com/poem/27323/

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Pixabay Images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

සිරිය දැනෙනවද බක්මහ මගුලට

 

අවුරුදු අවුරුදු ගම රට එනකොට 

එරබදු මල් වැල් කොහේද කොයිබට  

කොහාගේ  නාදෙත් ගොළුවී ඇතිකොට   

සිරිය දැනෙනවද බක්මහ මගුලට 

කැවුම් කොකිස් පිරි වට්ටි පිරෙනකොට 

හිතේ ඇදෙනවා ආච්චි හනිකට 

ඩිලිවරි කරලා කැවුම් ගන්නකොට 

සුවද මැරිලා රස දිවට නොමැතිකොට 

ලිප ගිනි මොලවා නැකතට කෑවට 

අද නෑ දරුවන් අපි ළග වටපිට  

එකමුතු කම සාමය රැකගන්නට  

හාදු පුදමු  අපි ලැප්ටොප් තිරයට 

අනුරුද්ධ වැලිගමගේ 

2026  අප්‍රේල්   මස ලන්ඩන් කවි කලාපයේ පලවිය.

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Google images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

කෝ ළමයි....

 

සරාගයේ හැගුම් පොකුරු ගුලිකර එක්කොට 

නිවාඩුවට ඔබ එනවා මාව දකින්නට 

පෙරුම් පුරා බලන් ඉන්න කැමති තුරුල්ලට  

මහන්සියට නිදි වාගෙයි ගොරවයි සද්දෙට 

සද තරුවැල් වෙහෙස වෙලා රාග කලාවට 

ජනේලයෙන් ඉර එබෙනවා හොර අල්ලන්නට 

අපට හොරා උදේ වෙලා දවස පිපෙන විට 

අනේ සුමේ පටන්ගන්න වෙලාව මේ  මට 

ගේ පොඩ්ඩේ ගුලිවෙන කොට තදවි  එයයිට 

මාමණ්ඩි අහයි මීයො ඇත්දැයි යමරෙට 

නැන්දම්මා පරල වෙද්දී ළමයෙක් නැතුවට 

අනේ අම්මේ ළමයි කොහෙද සෙල්ලම් නැතිකොට  

අනුරුද්ධ වැලිගමගේ 

2026  මාර්තු  මස ලන්ඩන් කවි කලාපයේ පලවිය.

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Google images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.

සුදු නංගිගේ හිනාවයි අගේ

 

හෙන්දිරික්ක මල් පිපිච්ච , පාට වැටුණු තරු දිලිච්ච 

සඳ රැස් පිරි ගුරු පාර දිගේ 

ගවුම පුරා මල් හැලිච්ච , හිනා හඩින් මුව පිරිච්ච 

සුදු නංගිගේ හිනාවයි අගේ 

රෑ හීනෙන් මට පෙනිච්ච , මගෙම ව‍ගේ මට දැනිච්ච 

විදුලි කොටන නෙත් යුවල ඇගේ 

ඇබුල බෙදනකොට පෙනිච්ච , රන් තැබිලිය සේ පිරිච්ච 

හංස යුවල හරි දඟයි වගේ 

තනි යහනේ දුක දැනිච්ච , සුසුම් හැගුම් ගුලි ගැහිච්ච 

කාලය දැන් නිම වෙලා වගේ 

අහස පුරා සද පිරිච්ච , පැතුම් පොකුරු මල් පිපිච්ච 

ඔබෙන් බහක් ලැබෙයි නම් අගේ 

අනුරුද්ධ වැලිගමගේ

2026  පෙබරවාරි මස ලන්ඩන් කවි කලාපයේ පලවිය.

විශේෂ ස්තූතිය-  ලන්ඩන් කවිය සංස්කාරක අනුර හෑගොඩ මහතාට

සේයාරූ -  අන්තර්ජාලයෙන්  Google images

සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.