මව් බිමෙන් බැහැරව ශීත හිමරටක වෙසෙන ශ්‍රී ලාංකිකයෙකුගේ මතක මංපෙත ........

Saturday, May 27, 2023

චිත්‍රපට ඇසුරින් ලෝක සවාරියක්

 


චිත්‍රපට බලන සිනමා ලෝලියෙකුට භාෂාව නොතේරුණත් ඒ හරහා ලෝකෙ වටේ යන්න පුළුවන්. ඒ ඉංග්‍රීසි උප සිරැසි  සහිතව වෙනස් භාෂා වලින් නිමැවුණු චිත්‍රපට බලන ගමන්. ඒ ඒ චිත්‍රපට හරහා ලෝකයේ භූගෝලීය වශයෙන් වෙනස් කලාප වලදීත් මිනිසුන් විදිහට අප එකට අත්විදින දුක, සැප බෙදාගන්න අපට පුළුවන්.  

 


The Miracle ( Mucize) - Turkish   (2015)

පවුලේ විරෝධය මැද්දෙ 1961 දී පාසල් ගුරුවරයෙකු වුනු මාහිර් නැගෙනහිර තුර්කියේ කදු අතර තිබෙන ඈත පිටිසර කුර්දීෂ් ගමකට පත්වීම් ලබා යනවා. ඒ ගමට යන්නට තියෙන්නේ දුම්රියෙන් ගිහින් දුෂ්කර පා ගමනකට පස්සෙ. පිටින් නිතර පිරිස් නොඑන ඒ ගම්මානවලට ආගන්තුකයින් නුහුරුයි . ඔහු පාසැලට අළුතින් එන ගුරුවරයා බව නොදැන ගම්මු ආයුධ සන්නද්ධව පැමිණ ඔහුව වටකරනවා. බියට පත් වුණත් ඔවුන් ආසාවෙන් ඔහුව පිලිගන්නවා.

පාසැලක් වෙනුවට මාහිර්ට දකින්නට ලැබෙන්නේ ගරා වැටුණු ගොඩනැගිල්ලක් විතරයි. තමන්ව ප්‍රාණ ඇපයට තියාගෙන කප්පම් ඉල්ලනවා කියල නගරයේ ඉන්න නෑදෑයින් ගෙන් ඔහු යම් මුදලක් ගෙන්වා ගන්නෙ පාසැල ගොඩනගන්නයි. ඒ වෙනුවෙන් ගමේ හැමෝගෙම උදව් ගන්නත් මාහිර් සමත් වෙනවා. අධ්‍යාපනය වෙනුවෙන් එතරම් උනන්දුවක් නොදක්වන මේ ගමේ දරුවන් කිහිප දෙනෙක් එකතු කරගෙන මාහිර් ආයෙමත් ඉස්කෝලෙ පටන් ගන්නවා. ඒ අතරෙ ආබාධිතයෙක් වන ගමේ ප්‍රධානියා ගේ පුතා අසීසුත් ඉන්නවා. 

විවාහ විය යිතු වයසේ හිටියත් අසීස්ට තමන්ගේ දුවව බන්දලා දෙන්න කවුරුත් අකමැති වෙන්නෙ ඔහුගෙ ආබාධිත තත්වය හින්ද. ඒ අතරෙ අසීස්ගෙ තාත්තා මරණයෙන් ජීවිතය බේරලා දෙන මිනිහෙක් ඒ වෙනුවෙන් තමන්ගේ දියණිය මිස්ගින් ව අසීස් ට විවාහ කරලා දෙන්න කැමති  වෙනවා.  මුලින් මිස්ගින් අසීස්ට අකමැති වුනත් කල් යනකොට ඇය ආදරයෙන් සලකනවා. ගැමියන්ගේ උසුළු විසුළු මැද්දේ ජීවිතයට එන කරදර හින්ද ඔවුන් දෙදෙනා ගමෙන් යන්නේ ආපසු එන බවට මාහිර්ට ලියුමක් ලියල තියලයි. 

පවුලේ බලකිරීම හින්ද ආපහු නගරයට යන මාහිර් හත් අවුරුද්දකට පස්සෙ ආයෙමත් අර ගමට එනකොට ඒ ගම වෙනස්වෙලා. ඉස්සර වගේ දැන් ගමට පයින් යන්න ඕනෙ නැහැ. ගමට වාහනයකින් යන්න පුළුවන් පාරක් තියෙනවා. ඒ වගේම ඔහුට දකින්නට ලැබෙන්නෙ දරුවන් පිරිවරාගෙන සතුටින් ඉන්න අසීස් සහ මිස්ගින් යුවලයි.

අපි කවුරුත් ආසකරන චින්ගීස් අයිත්මාන් ගේ පොත ඇසුරින් නිමැවුනු ගුරු ගීතය චිත්‍රපටයේ (The First Teacher )  යම් ලකුණු මේ චිත්‍රපටයේ පෙනෙන්නට තියෙනවා. 


2019 දී මෙහි දෙවන කොටස විදිහට තවත් චිත්‍රපටයක් නිර්මාණය කර තිබෙනවා.   

වැඩි විස්තර සදහා  IMDB යොමුව  …..

https://www.imdb.com/title/tt3138782/

 Trailer  යු ටියුබ් දිගුව  


 


 





 English Vinglish - Hindi (2012)

ශෂී කියන්නෙ ලඩ්ඩු කියන රසකැවිලි හදන සුළු ව්‍යාපාරයක් කරන ඉන්දීය ගෘහණියක්. ඇගේ සැමියා කාර්යාලයක රැකියාව කරන කෙනෙක්. ඇගේ දුව සප්නා, පුතා සාගර්. ඉංග්‍රීසි ගැන කථා කරන හැම වෙලාවකම සප්නා ගේත් , සතීෂ් ගේත් සමච්චලයට ලක් වෙනවා. ශෂී ගේ වැඩිමල් සොයුරිය මනු ඉන්නෙ ඇමෙරිකාවේ නිව් යෝර්ක් නුවරයි. ඇගේ වැඩිමහල් දියණිය මීරා ගේ විවාහ උත්සවයට උදව් වෙන්න කියල කල ආරාධනාවකට අනුව ඇය සති 5 කට කලින් නිව්යෝර්ක්  බලා යනවා. රැකියාව හින්ද සතීෂ්ට වගේම ඉස්කෝලෙ හින්ද සප්නා සහ සාගර්ට කලින් යන්න බැරි හින්ද ඇය ඒ ගමන යන්නෙ තනිවමයි.ගුවන් යානයේදී කල කතාබහකදී මගියෙක් ඇයට අවවාද දෙන්නෙ ඉංග්‍රීසි ඉගෙන ගන්න කියලයි. 

  කාටත් හොරා දැන්වීමකින් තොරතුරු හොයාගෙන ඇය සති 4 න ඉංග්‍රීසි උගන්වන නිව්යෝර්ක් පන්තියකට යන්නේ තමන්ගේ ව්‍යාපාරයෙන් උපයා තිබුණු මුදල් ගෙවමින් . නුපුරුදු නගරයේ ඇගේ පන්තියේ ඉන්නේ මෙක්සිකන් ගෘහ සේවිකා ඊවා, පකිස්ථාන් ටැක්සි රියැදුරු සල්මන්, චීන කොණ්ඩා මෝස්තර ශිල්පිනී යූ, දෙමළ පරිගණක මෘදුකාංග ඉංජිනේරු රාමමුර්ති, අප්‍රිකානුවෙකු වූ උඩුම්කේ සහ ප්‍රංශ සූපවේදී ලොරෙන්ට්. ඔවුන්ගේ ගුරුවරයා ඩේවිඩ්. ගෙදරට හොරා කට්ටිය වැඩට යන අතරේ පන්ති යන ශෂී ගේ පන්තිය ගැන දන්නේ මනු ගේ පොඩි දුව රාධා විතරයි. එය ගෙදරට නොකියන ඇය ශෂි ට උදව් කරනවා.    


 පන්තියේ අවසානයේ තිබෙන කථන පරීක්ෂණයට ශෂිට යන්න බැරිවෙන්නෙ කලින් එනවා කියූ දවසට කලින් පවුලේ අය නිව්යෝක් ආපු හින්දයි. මේ අතරෙ රාධා ශෂි ගේ ඉංග්‍රීසි පන්ති ගුරුවරයාටත් සිසුන් පිරිසටත් අක්කාගේ විවාහ උත්සවයට ආරාධනා කරනවා. ඒ වගේම මගුල් ගෙදරදී ශෂිගෙ කතාවක් මගුල් ගෙදර වැඩසටහනට එකතු කරනවා. ඉංග්‍රීසි කථාකරන පිරිමියෙක්ව කසාද බදින මේ මගුල් ගෙදරදී ඉංග්‍රීසි නොදන්නා ශෂි කොහොම කථා කරාවිද කියල හැමෝම පුදුමයෙන් බලන් ඉන්නවා. ඒ හැමෝම මවිත කරමින් ශෂී ලස්සන කථාවක් කරන්නෙ නව යුවලට යහපත් විවාහයකට ඔවදන් දෙමින්. කථාව අහල ඩේවිඩ් ඉංග්‍රීසි සහතිකය දෙනවා. ශෂී විවාහක කාන්තාවක් බව නොදැන ඇයට පෙම් කල ලොරේන්ට ඇය ස්තුතිවන්ත වෙනවා.

මේ කථාව බලද්දී 1970 දශකයේ අග භාගයේ එංගලන්තයේ නිෂ්පාදිත Mind your Language රූපවාහිනී කථා මාලාව සිහියට නැගෙනවා. 

වැඩි විස්තර සදහා විකිපීඩියා යොමුව  …..

https://en.wikipedia.org/wiki/English_Vinglish

 Trailer  යු ටියුබ් දිගුව    






Under The Tuscan Sun - English (2003)

සැන් ෆ්රැන්සිස්කෝ නගරයේ ඉන්නා ෆ්රැන්සස්  නම් කතුවරිය විවාහය දෙදරා යාමත් එක්ක මානසික ආතතියකට පත්වෙනවා.ඇගේ හොදම මිතුරිය පැටී මේ වෙනකොට ඉන්නෙ ග්‍රීසියේ. ඇය ගැබිනියක් නිසා කලින් වෙන්කරවා ගෙන තිබුණු ඉතාලි බස් සංචාරයකට ඇය වෙනුවට  ෆ්රැන්සස් ට යන්නට කියන්නේ ජිවිතයට වෙනසක් වෙන්නයි. මුලින් අකමැති වුනත් ෆ්රැන්සස් ඒ අදහසට එකග වෙලා ගමනට එකතුවෙනවා.

මේ සංචාරය අතරේ ඉතාලියේ  Tuscany ප්‍රදේශයේ ගමන් කරද්දී Cortona නගරයේ විලා එකක් විකිණීමට දාල තිබුණු දැන්වීමක් දකිනවා. ගමන යන අතරමගදී බැටළු රංචුවක් පාර පනින වෙලාවෙදි බස් එක හරියටම නතර වෙන්නෙ ඒ විලා එක අද්දර. ඇය රියැදුරාට දන්වා බසයෙන් බහින්නේ හිත යමක් කියූ හින්දයි. අවසානයේදී ඇය ඒ නිවස මිලදී ගන්නවා.

ගෙදර අලුත්වැඩියා කටයුතු සදහා ඇයට උදව් වෙන්නේ එවැනි කටයුතුවල යෙදෙන පෝලන්ත සංක්‍රමණිකයින්. ඒ අතර අසල්වැසියන් එක්ක මිතුරු වන ඇය බලන්නට අල්ලපු ගෙදර තරුණියත් නිතර ඇගේ ගෙදරට එනවා යනවා. ෆ්රැන්සස් ගේ ගෙදර අලුත්වැඩියා කටයුතු වලට එන පිරිස අතරේ ඉන්නා පවෙල් එක්ක අල්ලපු ගෙදර තරුණිය පෙමින් බැදෙනවා. දෙමාපිය විරෝධතාවන් සමනය කරලා ඔවුන්ට කසාදයට උදව් කරන  ෆ්රැන්සස් විවාහ උත්සවය සදහා තම විලා එක ලබා දෙනවා.  

 ඒ විවාහ උත්සවයට එන එඩ් නම් ඇමෙරිකානු කතුවරයා මින් පෙර නවකථාවක් සංස්කරණයේදී ඇය උදව් කල කෙනෙක් . ඔවුන්ගේ යලි හමුවීම ප්‍රේමයක් බවට හැරෙනවා.  

වැඩි විස්තර සදහා විකිපීඩියා යොමුව  …..

https://en.wikipedia.org/wiki/Under_the_Tuscan_Sun_(film)

 Trailer  යු ටියුබ් දිගුව    



 

303 - German (2018 )


 ජූලි තරුණ විශ්ව විද්‍යාල ශිෂ්‍යාවක්. මේ අධ්‍යන වාරය ඉවරවුනා විතරයි. ඇය සැක කරන්නේ ඇය ගැබ්ගෙන ඇති කියලයි. ඇගේ පෙම්වතා දැන් ඇය සමග වැඩි කතාබහක් නැත්තේ පෘතුගාලයේ ඉන්නා හින්දයි. ඇගේ මව කියන්නේ දරු ගැබ් නැති කර ගන්න කියලයි . එයට කැමති නැති ඇය පෘතුගාලයේ ඉන්නා ඔහු හමුවී මේ ගැන කථා කරන්න හිතනවා.ජර්මනියේ බර්ලින් නගරයේ ඉදන් ඇය මේ ගමන යන්නේ මර්සිඩීස් හයිමර් 303 වර්ගයේ මෝටර් රථ නිවහනකයි.( RV- Motorhome ). මගදී ඇගේ වාහනයට අත දාන්නේ ජෑන් නම් විශ්ව විද්‍යාල ශිෂ්‍යයා. බර්ලින් වල ඉදන් ස්පාඤඤයට ඔහු යන්නට බලාපොරොත්තු වන්නේ ජීව විද්‍යාත්මක තාත්තාව හමුවන්නයි. 

මුලින් ගමන යද්දී ඇතිවන මත ගැටුමක් හින්ද ජූලි ජෑන්ව මග දාල යනවා. ට්‍රුක් රථ රියැදුරෙකු සමග ආයෙමත් ගමන යද්දී අධිවේගයේ රාත්‍රී දුර ගමන් නැවතුම් පලකදී අතවරයකට ලක්වන ජූලි ව ඉන් බේරාගන්නේ එතැනට අහම්බෙන් ට්‍රක් එකෙන් ඇවිත් ඉන්නා ජෑන්. ඉන් පස්සෙ ජෑන් ට්‍රුක් රියැදුරාට ස්තුති කරලා ආයෙමත් ජූලි එක්ක ගමනට එකතු වෙනවා. දින ගණනක් රටවල් ගණනාවක් හරහා ගමන් ගන්නා ඔවුන් මේ ගමනේදී පරිසරය රස විදිමින්, ජීවිතය බෙදා ගනිමින් , විවිධ මාතෘකා ගැන කතාකරමින් යද්දී නොදැනීම ඔවුන් එකිනෙකාට ආදරය කරන්නට පටන් ගන්නවා.

ඉතා දර්ශනීය වෙරළ තීර, ඉර නැගීම සහ බැස්මේ මනරම් දසුන් රැසක් මේ නිර්මාණයට එකතු කර තිබෙනවා. ඒ වගේම ඇය මේ ගමනේදී කරන වෛද්‍ය පර්යේෂණයකින් ඇය ගැබ්ගෙන නැති බවත් තහවුරු වෙනවා. ජූලි ට ඇගේ කලින් පෙම්වතා හමුවේවිද ?. ජෑන් තමන්ගේ ජීව විද්‍යාත්මක පියා හමුවී කියන්නේ මොනවාද කියල දැනගන්න නම් මේ චිත්‍රපටය අන්තිම වෙනකම් නොඉවසිල්ලෙන් බලන්න වෙනවා.     

වැඩි විස්තර සදහා IMDB යොමුව  …..

https://www.imdb.com/title/tt5451118/

 Trailer  යු ටියුබ් දිගුව  




 

Sita Ramam - Telugu (2022 )

1964 දී පාකිස්තානු අන්තවාදී අන්සාරි කාශ්මීරයේ සුහදව වෙසෙන මුස්ලිම්වරු සහ හින්දූන් අතර ගැටුමක් නිර්මාණය කරන්නේ  මායිම් ගම්මානයේ වෙසෙන තරුණයින් පිරිසක් උසි ගැන්වීමෙන්. 

1985 දී ලන්ඩනයේ විශ්ව විද්‍යාලයකදී දැඩි මතවාදී අෆ්රින් ඉන්දීය දානපති ආනන්ද් ගේ මෝටර් රථය ගිනි තැබීම සම්බන්ධයෙන් චෝදනා ලබනවා. උප කුලපති තුමා කියන්නේ කල වරදට ආනන්ද් ගෙන් සමාව ඉල්ලීම හෝ වන්දි වශයෙන් ඉන්දීය රුපියල් ලක්ෂ 10 ක් මසක් ඇතුලත නොගෙව්වොත්  ඇයට සිරගත වන්නට සිදුවන බවයි. සමාව ඉල්ලන්නට අකමැති ඇයට සැනකින් මතක් වෙන්නෙ විශ්‍රාමික හමුදා බ්‍රිගේඩියර් වරයෙකු වන ඇගේ සීයාව. මුදල් ඉල්ලා ගන්නට කරච්චි නුවරට යන ඇයට දැනගන්න ලැබෙන්නේ දින කිහිපයකට පෙර සීයා මිය ගිය බවයි. සීයා ඔහුගේ අන්තිම කැමති පත්‍රය ලියා තිබෙන්නේ ඇයටයි. ඒත් එය ලබාගන්නට නම් හිටපු ඉන්දීය හමුදා ලුතිනන් රාම් ගේ ලියුමක් ඉන්දියාවේ හයිදරාබාද් හි වෙසෙන සීතා මහාලක්ෂ්මි වෙත ගෙන යා යුතුයි. 

අකමැත්තෙන් වුනත් අෆ්රින්ට ඉන්දියානු මිතුරු බාලාජි මාර්ගයෙන් සීතා සොයන්නට වෙනවා. ඒ කාර්යයේදී සිදුවන සිදුවීම් දාමය ඉතිහාසය සහ වර්තමානය ගැට ගස් වමින් පැටළුණු විශාල නූල් බෝලයක් වගේ සිදුවීම් රැසක් හෙලිදරව් කරනවා. මේ කලබගෑනි මැද්දේ ඉන්දියාවේ සහ පාකිස්ථානයේ ලස්සන තැන් රැසක් ඔබට දකින්නට පුළුවන්.

අවසානයේදී අෆ්රින් , ආනන්ද් මෙහෙතාගෙන් සමාව ගන්නා හින්ද මුදල් ගෙවන්නත්, නඩු යන්නත් අවශ්‍ය වන්නේ නැහැ. ඇගේ තොරතුරු හෙලිදරව්ව නිසා පාකිස්ථානයේ සිටි යුධ සිරකරුවන් 18 දෙනෙකුත් නිදහස් කෙරෙනවා.       

                      

 වැඩි විස්තර සදහා විකිපීඩියා යොමුව  …..

https://en.wikipedia.org/wiki/Sita_Ramam

 Trailer  යු ටියුබ් දිගුව    


   

       සේයාරූ -  අන්තර්ජාලයෙන්  Google Images

                        සියළු හිමිකම් මුල් හිමිකරුවන් සතුයි. 

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.


Saturday, May 13, 2023

මුහුණු පොතේ පැරණි පතපොත ඩිජිටල් ගත කරන මෙහෙවර ....



 මා ලංකාවේ සිටියදී එකතු කල විවිධ පතපොත පිරි පොත් රාක්කයක්ද , පුවත්පත්, සගරා ආදියේ පලවූ මගේ ලිපි ඇතුලත් කබඩ් එකක් ද විය. අන්තර්ජාල පහසුකම් නොතිබූ ඒ අවධියේ අපට ලොව වටා දැනුම ලබන්නට උදව් වූයේ සතිපතා පලවූ විවිධ පුවත්පත් සහ සති අන්ත පුවත්පත් වල අතිරේකයන් ය. නවයුගය, විජය,  Little Star  පුවත්පත් සමග අතිරේක වශයෙන් දුන් විශ්වකෝෂ සහ දැනුම් පොත් සේම කුඩා කතන්දර පොත් ද අඩු වැඩි වශයෙන් අපේ දැනුම වඩවන්නට හේතු විය. පසුකාලීනව එකතු වුනු විදුසර, විදුනැණ සහ සමුදුර සතිපතා පුවත්පත් නවයුගය අපට පෙර පරම්පරාවට දුන් දැනුම ඉදිරියට ගෙනගිය ප්‍රවාහයන්ය . ලක්බිම ඉරිදා පත්තරය සමගින් ලැබුණු අතිරේක , ඒ මග ඔස්සේ අනෙක් ඉරිදා පත්තර ගිය ගමන්මගේ සහ Sunday Times  විශේෂාංග ලිපි තුලින් අපව විවිධ චාරිකා ගෙනගිය අතරේ අම්මා කියැවූ රැජින පුවත්පත හරහා වෙනස් නවකතා සහ කවි කියවන්නටද අපට ඉඩක් ලැබුණි.  

ලංකාවේ නිවෙස්වල තිබෙන ආර්ද්‍රතා ගැටළු සේම වේයන්ගෙන් සහ මීයන්ගෙන් වන උවදුරු මැද සුදු පැහැයෙන් කහ ගැන්වුණු පැරණි පත්තර දිනෙන් දින විනාශයට පත්ව නැති නාස්ති වී ගිය බව මගේ දෙමාපියන් තහවුරු කලේ මා පහුගිය වතාවේ ලංකාවට ගිය විටය. බෑග් කිහිපයකට ජීවිතය ගුලි කරගෙන මේ රටට සංක්‍රමණය වෙද්දී ඒ පොත්පත ලංකාවේ දමා ආවේ එවන් ඉරණමක් ගැන  හිතට නොදැනුනු හින්දාය. සති කිහිපයක නිවාඩුවකට ගිය එවේලේ ඉන් දින කිහිපයක් ගතකර පැරණි පුවත්පත් පිටු කිහිපයක් පිටපත් කර ගන්නට ලේඛනාරක්ෂක දෙපාර්තමේන්තුවේ රස්තියාදු වෙද්දී දැනුණු වේදනාව වචන වලට පෙරැලිය නොහැකිය. සංස්කෘතික දෙපාර්තමේන්තුව, ජාතික ලේඛනාරක්ෂක දෙපාර්තමේන්තුව, ලේක්හවුස් ඇතුළු ලංකාවේ පැරණි ලිපි ලේඛන ඇතුලත් ආයතන එහි සම්පත් මුද්‍රිත මාධ්‍යයෙන් ඩිජිටල් ගත කර සංරක්ෂණය කර තිබුණේ  නම් කියා සිතුණු වාර අනන්තය. එවැනි පහසුකම් හෝ සුදානමක් මේ වනතුරුත් ඇත්දැයි මම නොදනිමි. 

පහුගිය මාර්තු මාසයේ මුහුණු පොතේ සැරිසරද්දී මම අපුරු පිටු කිහිපයක් දැක ගොඩවී බැලුවෙමි . පුදුමයක මහත! . ඒවායේ වූ සේයාරූ අතරින් මම දශක ගණනක පැරණි මතක තුලට යන්නාක් සේ හැගුණි. අන්තර්ජාලයේ පිහිටෙන් තත්පර කිහිපයකින් මේ වනවිට ලෝකයේ අස්සක් මුල්ලක් නෑර හැම තොරතුරක් පාහේ දැනගන්නට හැකිව තිබුනත් පැරණි පොතපත අතරට යනවිට ඒ හා බැදුණු බොහෝ දේ සිහියට නැගෙන්නේ නොදැනීමය. 

අප කුඩා කාලයේ පත්තරය ගෙදරට ගෙන ආවේ පාපැදියක පසුපස ලගේජයේ සහ ඉදිරිපස හැඩලයට ඉදිරියෙන් වූ තට්ටුවක පත්තර ගොඩ ගසාගෙන ගෙයින් ගෙට ගිය තරමක වයස්ගත මහත්මයෙකු විසිනි. සතියේ නියමිත දිනයේ උදෑසනත්, සෙනසුරාදා උදෑසනත් අප ඇණවුම් කර තිබුණු පුවත්පත් සීනුවක් නාද කර බාරදීම ඔහුගේ කාර්යය විය. ඉරිදා සිංහල පත්තර සෙනසුරාදා දිනයේදී ලැබුණත් ඉංග්‍රීසි පත්තරය ලැබුනේ ඉරිදා දවසේමය. යම් තැන්පතු මුදලක් සහිතව එකල පත්තර ඒජන්සිය වූ නිල්මිණි ආයතනයට නියමිත මාසික පත්තර බිල ගෙව්වේද ඔහුටමය. තීන්ත සුවද පිරි අළුත් පත්තර අපට අපූරු මිහිරක් ගෙන ආ බවද මතකය. 

භීෂණ සමයේදී ලේක්හවුස් පුවත්පත් විකිණීමට තහනමක් තිබුණු නිසා , ඒ වන විට මගේ ලිපි පලවූ මිහිර, විදුනැණ, නවයුගය සහ සිළුමිණ පුවත්පත් පිටපත් ගන්නට මාතර කොටුවේ ගැමුණු හේවා බල ඇණියේ හමුදා කඩය වෙතටත්, පෙරමග සගරාව ගන්නට දුම්රියපොල අසල පිහිටි ගොඩනැගිලි ද්‍රව්‍ය සංස්ථාවේ විකිණුම් හල වෙතටත් පාපැදියකින් යන්නට සිදුවිය.  ඒ පත්තර ගෙන එන්නට සිදුවුනේ අරක්කු හෝ සනීපාරක්ෂක තුවා පැකට්ටු ලංකාවේදී එකල දමා දුන් අයුරින් කඩදාසි උරවල දමා සගවා ගෙනය. ඒ කොහේ හෝ හැංගී අප දිහා බලා හිදී දැයි නොදන්නා දේශප්‍රේමී සහෝදරවරුන් නිසාය. අද කාලය හා සසදන විට ඒ කාලයේ පත්තරවල මුද්‍රිත අකුරු රටා ඒකාකාරී වුවත්, තිබුණු සේයාරූ සහ චිත්‍ර ගුණාත්මක බවින් අඩු වුවත් අළුත් පත්තරයක් දුටු විට දැනුනු සතුට වචනයෙන් විස්තර කරන්නට  අසීරුය.  

ඒවාගේම බාලක පාසැලක ඉගැනුම ලැබූ අප  යොවුන් වියට පිය මනින කාලයේදී සංසරණය  වුනු "වල් පත්තර " කුතුහලයෙන් පිරි  දරුවන්ට වෙනස්ම වින්දනයක් ගෙන දුන් බව මතකය. ලංකාවේ පරිසරය හා ගලපා ලියැවුණු කතන්දර වලට බටහිර හෝ ආසියානු කාම ප්‍රකාශන වලින් සපයා ගත් සේයාරූ යෙදූ ඒවා ගෙදරට ගෙනයාමට හැකියාවක් නොතිබුණු නිසා හවුලේ අපි එබී බැලුවේ පාසැලේ හැංගෙන්නට පුළුවන් අහුමුළු වල මුරකරුවන් තබා මාරුවෙන් මාරුවටය. ගුරුවරයින් අතර තරමක හොද නමක් දිනාසිටි මාව පන්තියෙන් පංතියට එවැනි ප්‍රකාශන ප්‍රවාහනය සදහා යොදා ගැනුණු බැවින් වරෙක විනය පාලක ගුරු භවතාට හසු නොවී බේරුණේ අනූ නමයෙනි. ඒ වාගේම වරක් උඩුකය නිරුවත් කාන්තා රූප කිහිපයක් ගණිත ගුරුවරයාට හසුවීමෙන් පසුව ගෙන ආ කෙනා අල්වා නොදුන් නිසා විදුහලේ පිට්ටනියේ පීරියඩ් දෙකක්ම අව්වේ දණ ගසා ඉන්නට අප පන්තියටම සිදුවූ හැටි මතක් වෙද්දී අද වනවිට අන්තර්ජාලයේදී ඒවා අතිශය සාමාන්‍ය වී තිබෙන හැටි දකින විට හිනා යන්නේ ඉබේටමය.   

මේ වනවිට සොයා ගන්නට නොමැති පැරණි පොත පත සහ පුවත්පත් මුහුණු පොත හරහා ජනගත කරමින් ශ්‍රී ලංකාවේ පැරණි පුවත්පත් හා සගරා සහ පැරණි පොත් ඇඩ්මින් වරුන් කරන ජාතික කාර්යභාරය අගය කලයුත්තේ ඒ සදහා ඔවුන් දරන වෙහෙස මහන්සිය දකින විටදීය. මා කුඩා කාලයේදී පැරණි පොතපත තිබූ තැන්වලදී ඒවා කියැවීමෙන් ඔබ්බට ගොස් ලද විදීම මේ වනවිට සිංහල පොතපත නැති පරිසරයක ජීවත්වන මට පිරිමසා ගන්නට පුළුවන් වන්නේ මේ ඩිජිටල් මාධ්‍යය හරහාය. ඒ සදහා ඔබට සිංහල බ්ලොග් අඩවි වලදීද යම් යම් සටහන් දකින්නට ලැබුණත් එකම තැනකදී විශාල ප්‍රකාශන තොගයක් දකින්නට ලැබෙන්නේ නැත. ඒ නිසා ඒවා කියවා ඔබේ මතක සටහන් කොමෙන්ටු ලෙස දමන්නේ නම් එහි අන්ත්ර්ගතයය අමතරව ඒවා සමග අපේ අතීත මතක සමපාත කරගන්නටද ඉඩක් ලැබෙනු ඇත. ඔබේ මිතුරන් ඒ මුහුණු පොත් සමූහයන්ට එකතු කරන අතරේම ඔවුන්ගේ මහන්සිය සොරාගන්නා අයවලුන් දුටුවොත් නියම යොමුව සදහන් කිරීමද වටී. 



ශ්‍රී ලoකාවේ පැරණි පුවත්පත් හා සගරා OLD NEWS PAPERS &MAGAZINE IN SRI L

https://www.facebook.com/groups/550428005889699


ඉසිඹුව

@Isimbuwa.fb Entertainment website

https://www.facebook.com/Isimbuwa.fb/

පක්ෂ දේශපාලනය, ආගම්,  මතවාද, වල්පල් ජනගත කරමින් කාලය කා දමන අතරේම තමන්ගේ ලොකුකම් , පුරාජේරු පෙන්වන තැනක් ලෙස හංවඩු ගැසී තිබෙන මුහුණු පොත යහපත් කාර්යභාරයක් සදහා යොදාගත හැකියැයි ඔප්පු කරනා ව්‍යාපෘති අතරේ ඉදිරි තැනක ලා මෙය තැබිය යුත්තේ ඒ සදහා තම ධනය , කාලය කැපකරන පිරිස දකිනා විටය. මේ සටහන ඔවුනට උපහාරයක්ම වේවා !.    

        

    


සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.

   

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ
ඉදිරි නිර්මාණ එළිය  කරාවි.

Saturday, May 6, 2023

කළු මල්ලි නැතිවෙලා!

 


“දැන් වෙලාව එකොළහයි, මෙහෙමද හයි ස්කූල් ළමයි, පස්ස පැත්තට එළිය වැටෙනකම් බුදියන්නෙ නැතුව නැගිටිනවා! අම්මගේ සුපුරුදු ගෝරනාඩුව ඇහුණෙ දැන් පැය භාගෙකට විතර කලින්. 

ඊයේ පාන්දර වෙනකම් යාළුවො එක්ක ගේම් ගහ ගහ හිටපු හින්ද සමින්දට තාමත් නිදිමතයි. කළු මල්ලි ඇවිත් පොරෝනය ඇදල යනකොට සමින්ද තවත් තදින් ඇහැ පියා ගත්ත වගේ මතකයි. අනේ පව්! සෙල්ලම් කරන්න වෙන්නැති. ඒත් ආපහු හැරිලා ගිහින්. 

“අර පෙයාස් ගහ ගාව තියෙන විලෝ ගහ පාත්ති පැත්තට බර වැඩියි. වැටට අල්ලලා ගැට ගැහුවොත් නරක ද?” අම්මා කියනවා  ඇහුණා.

“අද හොදට පායලා. නියම දවසක්. පුතේ අර පාත්තිවල පස් බුරුල් කරලා දීපන්. මට කොටන්න බැහැ. හරි හයියයිසීයා තාත්තට කියනවත් ඇහුණා. කට්ටියම වත්ත පහට යන්න ඇති. ගෙදර සද්දෙ අඩුවෙලා වගේ!” සමින්දට හිතුණා.

තාත්තා ගැරේජ් එක පැත්තට ගිහින් මොනවද හොයනවා වගේ ඇහුණෙ මොන මොනවා හරි ඇදපු හින්ද. ගහ ගැට ගහන්න කම්බි හරි ලණු හරි හොයනවා ඇති. ආයෙමත් ටිකකට පස්සෙ ගෙදර වැකුම් කරනවත් ඇහුණා. “හය්යෝ මේ දොරවල් හායි ගාල ඇරලා” ආච්චි කියනවත් ඇහුණා. ආච්චිට දොරක් ඇරලා තියෙනවා පේන්න බැහැ.

හෝම් වර්ක් වගයක් තිබුණත් සමින්දට හිතුණෙ තව ටිකක් ඇදේ ගුලිවෙලා ඉන්න. හැබැයි ෂුවර් එකටම තව ටිකකින් අම්මා ඇවිත් ඉර එළිය වැටෙන්න ජනෙල් රෙද්ද අරිනවා. ඒ හින්ද සමින්ද හිටියෙ කෝකටත් රෙඩිවෙලා.

“කුමාරි, කුමාරි බලන්න, බලන්න, කළු මල්ලි නැහැ නේ! මම උදේ කන කොටත් ළගට ම වෙලා හිටියා. සෙල්ලම් කරන්න කවුරුත් නැති නිසා හැංගිලා ද දන්නෙත් නැහැ” ආච්චි කියනවා සමින්ද අහගෙන.

“මම හැම තැනම බැලුවා මේ ළමයා කොහාට වෙලා ද දන්නේ නැහැ” අම්මත් කිව්වා.

“කලබල නැතුව බලන්න කුමාරි! ඔය කොහෙ හරි අස්සකට වෙලා ඇති. කාමරවල දොර මුළු බැලුව ද?” එහෙම කිව්වෙ සීයා.

“මම හැමතැනම බැලුව තාත්තේ! සරත්, සරත් මෙහාට එන්නකො. කළු මල්ලී නෑ නේ! අම්මාගේ කෑ ගැහිල්ලට තාත්තා මොකුත් නොකීවත් පහට යන බව දැනුණේ පඩිපෙ වේගෙන් බැහැපු හින්දා.

“ඔයාට නම් මොකද, පත්තරයක් හරි ඉන්ටනෙට් එක හරි තියෙනව නම් ලෝකෙ ගිනිගත්තත් කිසි ගාක් නැහැ!” අම්මගේ මේ චෝදනාව සමින්දට පුරුදු එකක්.

“හරි, හරි, දැන් මොකද වෙලා තියෙන්නේ?

“කළු මල්ලී නැහැ!

“ගේ ඇතුළෙ වෙනද ඉන්න තැන් ඔක්කොම බැලුව ද?”

“බැලුව මනුස්සයො, නැති හින්දනෙ කියන්නෙ! එහෙම කියන්නෙ අම්මට ටිකක් තරහ ගිහාම . ඒ කියන්නෙ වැඩේ සීරියස් වගේ.



සමින්දත් දනි පනි ගාලා ඇදෙන් බිමට පැන්නා. 

“මොකද වෙලා තියෙන්නෙ?” සමින්ද ඇහුවෙ පුදුම වෙලා ඉන්න අම්මගෙන්.

“කළු මල්ලි නැහැ!” අම්ම කිව්වෙ දුකෙන්.

“හැම තැනම බැලුව ද? ඔය කොහේ හරි හැංගිලා ඇති . මටත් කීද්දුව සෙල්ලම් කරන්න. එයාට වගේයැ අපට?

අම්ම කතාව ඉවර කරන්න දුන්නෙ නැහැ. “ඔව් ඉතින් රෑ තිස්සෙ රස්සාවක් කරනවා යැ. අර කට්ටිය එක්ක උඩ පැන පැන ගේම් ගහනවා මිසක්!

කට්ටියට ම පුදුමයි හිටි හැටියෙ මොකද මේ කළු මල්ලිට වුණේ කියල. ගෙදර කොහේවත් නැහැ.

තාත්තා ඉස්සරහ දොර, ගැරේජ් එක, පිටිපස්සෙ දොර ගාව කැමරාවෙ රෙකෝඩින් බැලුව. කිසි හෝඩුවාවක් නැහැ.

“සරත් අනේ ඉක්මට මොනවා හරි කරන්න. මේ ළමයට මොනවා වුණා ද දන්නෙ නැහැ.”

“පොඩ්ඩක් කලබල නැතුව ඉන්නකො. අපි බලමු දැන් මොනවද කරන්න පුළුවන් කියල.

සමින්දට ඇහෙන්නෙ තාත්තා කෝල් එකක් ගන්න සද්දෙ. ස්පීකර් ෆෝන් දාල හින්ද කියන දේත් ඇහෙනවා. එහා පැත්තෙන් විස්තර අහනවා, ලිපිනය, අන්තිමට දැක්ක වෙලාව, හැඩ හුරුකම, වයස!

“අද ඉරිදා හින්දා අපේ වැඩකරන අය අඩුයි . සිස්ටම් එකේ අප්ඩේට් කළා. ඒත් අපේ කෙනෙක් තව ටිකකින් කථා කරාවි. වෙබ් එකේ තියෙන විස්තර අනුව වැඩ කරන්න!” නගර සභාවෙ හදිසි ඇමතුම් නිලධාරිනිය කියනවා. 

“ඔයාට කිසි ගාණක් නෑ! අපේ පොඩි එකාට ගෙදරින් එළියට ගිහින් පුරුදු නැහැනෙ” අම්මගේ කතාවට ආච්චිත් මොනවා හරි කිව්වත් සමින්දට ඒක හරියට ඇහුණෙ නැහැ.

සමින්ද මුහුණු පොතට ගිහින් නැතිවුණා, හම්බ වුණා එකතුවල කථා කරන්න දුරකථන අංකයත්, ෆොටෝ එකකුත් එක්ක පොස්ට් කිහිපයක් දැම්මා. අන්තිමට දැක්ක වෙලාව, හැඩ හුරුකම, වයස එක්ක ෆොටෝ එකකුත් දාලා ප්‍රින්ට් කරන්න පෝස්ටරයකුත් හදා ගත්තා.

අම්මයි තාත්තයි වටේ ම ගෙවල් වලට ගිහින් ඒ ගොල්ලො දැක්කද කියල තොරතුරු අහනවා. කිසි හෝඩුවාවක් නැහැ වගේ. කාටවත් දවල්ට කන්නත් උවමනාවක් නැති පාටයි. 

“ඔයා තමයි පිටිපස්සෙ දොර ඇරලා තිබ්බෙ!” ආච්චි කියන්නෙ හරියට සීයා වැරැද්ද කළා වගේ.

“හායි ගාල ගැරේජ් එකේ දොරත් ඇරලා තිබ්බ!” ආච්චි ආයෙමත් කියෝනවා.

“අම්මේ කළු මල්ලී නැතිවෙලාද? මල්ලී මේ ෆේස්බුක් එකේ දාල තියෙන්නෙ!” අක්කා අම්මට කථා කරනවා.

“පොඩි පුතා මොකද මේ අක්කව ගිනි තිබ්බෙ. ඒ ළමයට විභාගෙ අනිද්දා” අම්ම කෑගහන්නේ සමින්දට.



කළු මල්ලි කියන්නෙ සමින්දලගේ පූසා. ඌ කළුම කළු මාස දහයක හුරතල් පූස් පැටියෙක්. මේ නගරයේ ලියාපදිංචි සහතිකේ විදිහට නම් “ඔලිවර් ෆොන්සේකා”. ඒ තාත්තගේ වාසගම එක්ක.

එවරෙඩි බැටරි සන්නාමයේ නොම්මර නමය අතරින් පනින කළු පූසා වගේ හින්ද ආච්චී ඌට කියන්නෙ “එවරෙඩි පූසා” කියලයි. අම්මට පුංචි පුතා වෙච්ච ඔලිවර්ට කළු මල්ලි කියන නම දැම්මේ සීයා. කොහොම හරි අද දවල් ඉන් ඔලිවර් ආගිය අතක් නැහැ.

සමින්ද යාළුවෙක් එක්ක ගිහින් ළග තියෙන ප්‍රින්ට් ෂොප් එකකින් පෝස්ටරේ ප්‍රින්ටවුට් විස්සක් අරගෙන ආවා. දෙන්නත් එක්ක එකතු වෙලා ළග තියෙන ලියුම් පෙට්ටිවලයි. වටේ ම පාරවල්වල ලයිට් කණු පහේ පහේ දුරට ඒවා ඇලෙව්වා. ළගපාත ගෙවල්වලට ගිහින් ඔලිවර් දැක්කොත් කියන්න කියලත් කිව්වා. 

කට්ටියම බලාගෙන ඉන්නවා. විටින් විට මුහුණු පොතේ අතරමං වුණු පූසො ගැන අප්ඩේට් වෙන විස්තර බලනවා. අන්තර්ජාලයේ කියල තිබුණු විදිහට ම ඉස්සරහ ගරාජ් එකේ දොර ඇරලා, එයාගෙ කෑම භාජනයකට කෑමයි, අසූචි දාන්න පෙට්ටියකුයි තිබ්බා. පිටිපස්සෙ දොර ගාවත් එහෙම්ම ම භාජන දෙකක් තිබ්බා. එළියට ගිහින් පුරුදු නැති වුණත්, පූසො ඉවට එන හින්ද වැඩේ ටක්කෙටම හරි යනවා කියලයි ඉන්ටනෙට් එකේ තිබුණේ.

නගර සභාවෙන් කථා කළා. ඒ ගොල්ලන්ට තාම කිසි හෝඩුවාවක් නැති ලු. මේ වතාවෙ අවවාද කරනවා කිව්වා. ආයෙත් මේ වගේ දෙයක් වුණොත් පන්දාහක් දඩ ලු. තොරතුරක් ලැබුණොත් කියන්නම් කියලත් කිව්වා.

හවස් වෙනකොට ලොකු අම්මයි, මහප්පයි දෙන්නත් ආවා. ඒ දෙන්නටත් දුකයි. හීන් වැහිපොදක් වැටෙන්න පටන් ගත්තා. ඔලිවර් ගේ රෑ කෑම වෙලාවත් කිට්ටුයි. අම්මයි, ආච්ච්යි දෙන්න “පව් අහිංසකයා” කියල අනවා.

සමින්දට පොඩි සද්දයක් ඇහිලා ගැරේජ් එක දිහාට දුවගෙන ගියා. පුදුමෙනුත් පුදුමයි. ඔලිවර් ඇවිත් කෑම කනවා.

“අම්මේ ඔලිවර් ඇවිත්!” සමින්ද ඌව වඩාගෙන සාලෙට ආවා.

හැමෝගෙම මුහුණුවල සතුටු හිනාවක් වැටිලා දිලිසෙමින් තිබුණා .

“ඇති යාන්තම්” අම්මට කියැවුණේ ඉබේට ම.


- අනුරුද්ධ වැලිගමගේ


කළු මල්ලි නැතිවෙලා!

අනුරුද්ධ වැලිගමගේ


මගේ කතාව සංස්කරණය කොට ඕස්ට්‍රේලියාවේ සිඩ්නි නුවර පලවන සිසිල   2023 මැයි   මස කලාපයට එක් කලේ එහි සංස්කාරක රසික සුරියආරච්චි විසිනි.
 ( බ්ලොග් රචක - රසිකොලොජි ) 


හරබර විවිධ අංග ඇතුලත් සම්පුර්ණ කලාප ලබාගැනීම සදහා 
sisila.sangarawa@gmail.com ලිපිනයට
ඊ-මේලයක් යවන්න. 



සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න.ඔබේ ගුණ දොස් මගේ ඉදිරි නිර්  මාණ  එළිය කරාවි.