ප්‍රවාහනය ඇසුරින් ලෝකය දිහා බලන අපූරු you tube වැඩසටහන් එකතුවක්

 

මා බ්ලොග් එකට එකතු කරන සමහර සටහන්වල  තිබෙන වාර්තා වැඩසටහන් තමන්ට බලන්නට නොහැකි වන්නේ  ඒවායේ මූලාශ්‍ර හොයාගන්නට බැරි හින්දා කියලා සහෝදර  බ්ලොග් රචකයන් කිහිපදෙනෙක්ම ලියා තිබුණා. . මම චිත්‍රපට සහ වාර්තා වැඩසටහන් බොහොමයක් බලන්නේ  IPTV හරහා.ඉඳ හිට you tube  එකෙනුත් ඒවා බලන අවස්ථා තිබෙනවා. අධික වෙළඳ දැන්වීම් ධාරිතාවය වගේම ඒවායේ ශ්‍රව්‍ය දෘශ්‍ය තත්වයන්   ඒ තරම් හොඳ නැති හින්දා මම youtube එකට ගොඩ වෙන අවස්ථා අඩුයි. පහුගිය විවේක කාලෙ ඒවගේ වැඩසටහන් කිහිපයක් බලන්න  මට ඉඩකඩ ලැබුණා. . මේ ඒ වගේ මගේ හිත ගත්ත වැඩසටහන් පහක්.  සමහර ඒවා වැඩසටහන් පෙළක් හින්දා මමත් තවම සම්පූර්ණ වැඩසටහන් පෙළම බලලා නැහැ. . ඒ හින්දා මගේ සටහන සම්පූර්ණ නැතිවෙන්න පුළුවන්. 

Most Dangerous Ways To School

සංවර්ධනය නොවූ රටවල ජනතාවට දියුණු වෙන්න තියන හොඳම ක්‍රමය ඉගෙනීම විතරයි. ඒ  සඳහා තියෙන පහසුකම් බොහෝ විට කේන්ද්‍රගත වෙලා තියෙන්නේ ඒ ඒ රටවල ප්‍රධාන නගර කිහිපයකට විතරයි.  ඒ හින්ද ගම්වල කෙනෙකුට නගරයේ ඉස්කෝලෙට යන්න තියෙන අසීරු බව ලෝකෙ බොහෝ රටවලදී දකින්න පුළුවන්.  ඒ දවස්වල ලංකාවේ වුණත් ගම්වල උදවියට නගරයේ තියෙන ඉස්කෝලවලට යන ගමන  හරිම අසීරු කටයුත්තක් වුණා කියලයි මම අහල තියෙන්නේ. ඒත් ඒ බාධක මැද්දෙ ඉගෙන ගත්ත අය ලෝකෙ විවිධ රටවල සංවර්ධනයට කර තිබෙන දායකත්වයට උදාහරණ ඕනෑ තරම් දෙන්න පුළුවන්. මේ වැඩසටහන් පෙළේ ළමයි ඉස්කෝලේ යන්න විදින දුක දැක්කාම ලංකාවෙ හිටි අපට කොච්චර පහසුකම් තිබුණාද කියලා හිතෙනවා.  මේ වැඩසටහන් පෙල බැලුවොත්  රටවල් 15 ජනතාව දරුවන් පාසල් යවන්න දෙමාපියන් දරන කැපවීම සහ මහන්සිය ඔබටම දකින්න පුළුවන්.

යූ ටියුබයෙන් හොයන්න පාවිච්චි කරන්න පුළුවන් නම සහ වැඩසටහනක දිගුවක්. 

Most Dangerous Ways To School

Deadliest Roads

ලෝකෙ ගොඩක් රටවල් දුප්පත් වෙලා තියෙන්නෙත්, ප්‍රවාහනය වෙනුවෙන් වැඩි මහන්සියක් සහ කාලයක් ගත කරන්නෙත් ඒ ඒ රටවල් වලින් පාලනය කරන අයගේ සහ ක්‍රමවේද වල  වැරදි නිසා කියලයි මට හිතෙන්නෙ. මේ වැඩසටහන් පෙළ චරිත කිහිපයක් සහ  සිද්ධි කිහිපයක් අරගෙන රටවල් ගණනක ප්‍රවාහනය ගැන කතා කරනවා.  කැනඩාවෙන් ආධාර විදියට ලැබුණු පැරැණි දුම්රිය එන්ජින් ලංකාවේ දී නඩත්තු කරනවා වගේම ඒ ඒ රටවල කාර්මිකයන් සහ රියදුරන්  පැරණි මෝටර් රථ භාවිතයෙන් කොයිතරම් අසීරු සේවයක් සපයනවාද කියන එකත්, ඒ ඒ  රටේ ජන ජීවිතය ගැනත් බොහෝ තොරතුරු මේ වැඩසටහන් පෙළින් ඔබට දැනගන්න පුළුවන්. මේ වැඩසටහන් පෙළේවැඩසටහන් 66 ක් තියෙන හින්දා මේ ලියන මමත්  බලලා තියෙන්නේ වැඩසටහන් කිහිපයක් විතරයි.

යූ ටියුබයෙන් හොයන්න පාවිච්චි කරන්න පුළුවන් නම සහ වැඩසටහනක දිගුවක්.

Deadliest Roads

World’s Fastest train- The Race for Speed

වේගය සදහා ලෝකයේ තිබුණු තරගය හිට්ලර් ගේ පාලන සමය දක්වාම දිව යනවා. තමන් අධිරාජ්‍යය තනා ගත්තොත් ඒ  ඒ රටවලට යන්න ඔහු පාවිච්චි කරන්න බලාපොරොත්තු වුනේ දුම්රිය තමයි. ඒ හින්ද දෙවන ලෝක යුද්ධයෙන් පස්සෙ ලෝකයේ අධිවේගී දුම්රිය තාක්ෂණය,  සැහැල්ලු දුම්රිය තාක්ෂණය වෙනුවෙන් තිබුණු කැපවීමේ ප්‍රථිපල අද තියෙන්නේ ඉතා ඉහල තත්වයක. යුරෝපයේ , චීනයේ,  ජපානයේ  සහ දකුණු කොරියාවේ  ජනතාව අත්විඳින ඒ පහසුව  උතුරු ඇමරිකාවේ ඉන්නා අපට අහිමි වුනේ ඇමෙරිකන් මෝටර් රථ නිෂ්පාදකයින් සහ පාලකයින් එය වාහන නිෂ්පාදනය සහ ආර්ථිකයට තර්ජනයක් වෙතැයි හිතූ හින්ද. ශ්‍රී ලංකාවට එය අහිමිවී තිබෙන්නේ දේශපාලකයින් ගත් මෝඩ තීරණ හින්දයි. නිකම්ම අධිවේගී දුම්රිය ගැන කියනවාට වඩා මේ වැඩසටහන අද වන විට ඔබට දකින තත්ත්වයට අධිවේගී දුම්රිය දියුණු වූ ආකාරය හොඳින්ම විස්තර කරන වැඩසටහනක්.

යූ ටියුබයෙන් හොයන්න පාවිච්චි කරන්න පුළුවන් නම සහ වැඩසටහනේ  දිගුව

World's Fastest Train - The Race for Speed | Free Documentary

Singapore Car Road Trip from London

1950 - 1970 කාලයේදී ලන්ඩනයේ ඉඳන් කොළඹ දක්වාම ගොඩබිම් මාර්ගයේ බස් සේවාවක් ක්‍රියාත්මක වුනු  බව අහලා තියෙනවා.  අද වෙනකොට නම් මිනිස්සු ගුවනින් එංගලන්තයට යනවා මිසක් බස් එකෙන් එංගලන්තෙට යන්නේ නෑ. . පහුගිය අවුරුද්දේ සිංගප්පූරුවේ ඔටෝ මොබයිල් සංගමයේ මෙහෙයවීමෙන් රථ වාහන පෙළක් රටවල් විසිතුනක් හරහා ඇවිත් දින 98 ක දී සිංගප්පූරුවට ආ ගමනේ පැයක වීඩියෝවකට කෙටි කරල තියන අපූරුව මේ වැඩසටහනින් ඔබට බලන්න පුළුවන්.

එක යුවලක් තමන්ගෙ ගමන යනවා වගේ පෙනුනත්,  සිංගප්පූරුවේ ඉඳන් නැවෙන් වාහන ලන්ඩන් වලට යවල වාහන 12 ක 33 දෙනෙක් ගිය ගමනක් හින්දා ඔබත් මේ ගමනේ අසිරිය විඳීවි. ඔවුන් කියන විදිහට මේ ගමනේදී ඔවුන් දින 21 ක්  ගත කරලා තියෙන්නේ චීනයේ අසිරිය විදිමින් ඒ  හරහා යන්න තමයි.

යූ ටියුබයෙන් හොයන්න පාවිච්චි කරන්න පුළුවන් නම සහ වැඩසටහනේ  දිගුව

Singapore Car Road Trip from London  

Sri Lanka’s Tuk  Tuk Tournament by SilkyRon the road

ශ්‍රී ලංකාවේ සංචාරක ව්‍යාපාරය ප්‍රවර්ධනය වෙනුවෙන් නාස් ඩේලි( NAS Daily) ඇතුළු youtube vlog නිර්මාණ ශිල්පීන් විශාල පිරිසක් මේ වනවිට යූ ටියුබයට විශාල වැඩසටහන් ගොන්නක් මුදාහැර තිබෙනවා. පසුගියදා ලංකාවේ පැවැත්වුණු සංචාරකයන් ත්‍රිරෝද රථවලින් ලංකාව පුරා යන වැඩසටහන් මාලාව අඩු වියදමකින් ලෝකය වටා සංචාරය කරන විදේශික තරුණ ප්‍රජාව ආකර්ෂණයට ගැනුණු හොඳ උත්සාහයක්. බෙල්ජියන් තරුණියක් සහ ස්කොට්ලන්ත තරුණයෙක් යූ ටියුබයට මුදාහැර තිබුණු මේ වීලොග් එක ලංකාව දිහා වෙනස් විදිහට බැලූ එකක්.

යූ ටියුබයෙන් හොයන්න පාවිච්චි කරන්න පුළුවන් නම සහ වැඩසටහනක දිගුවක්.

CRAZY TukTuk Tournament in Sri Lanka 2023

අනුරුද්ධ වැලිගමගේ

සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිර්මාණ එළිය කරාවි.