හිරු උදාවත් එක්ක Antelope Canyon සහ Horseshoe Bend හැඩ බලන්නට ....ඇමෙරිකානු සංචාරයක මතකය ...... Grand Canyon වටේ රවුමක් 2.

Grand Canyon කියල කියන්නේ පොලොවේ තිබෙන විශාල අගාධයක්. එය දිගින් කිලෝමීටර 446 ක් පළලින් කිලෝමීටර 29 ක්. සමහර තැන් මීටර් 1800 ක් තරම් ගැඹුරුයි .වසර මිලියන ගණනක් තිස්සේ කොලරාඩෝ ගග ගලා යද්දී සෝදාගිය බිම් කඩක් .කොලරාඩෝ ගග, කොලරාඩෝ ප්‍රාන්තයේ රොකී කදුවැටියෙන් පටන්ගෙන මෙක්සිකෝවේ බාජා කැලිෆෝනියා සහ සෙනෝරා අතරින් පැසිපික් සාගරයට එකතු වෙනවා .ඇමෙරිකාවේ ප්‍රාන්ත 7 ක් සහ මෙක්සිකෝවේ ප්‍රාන්ත 2 ක් පහුකරගෙන කිලෝමීටර් 2330 ක් දුර යන මේ ගග ජලය සහ විදුලිය සපයමින් විශාල ජනතාවකට සෙත සදනවා.

Grand Canyon වල විශාල ප්‍රමාණයක් තිබෙන්නේ Arizona ප්‍රාන්තයේ .කුඩා ප්‍රමාණයක් Utah සහ Nevada ප්‍රාන්ත වලත් පිහිටා තිබෙනවා. ඇමෙරිකානු National Park service යටතේ පාලනය වන Grand Canyon national park, සමහර කොටස් Hualapail Tribal nation සහ Havasupai Tribe යටතේ පාලනය වෙනවා. නෙවාඩා ප්‍රාන්තයේ ලාස් වේගාස් වලින් අපි ගමන පටන් ගත්තා Utah ප්‍රාන්තය හරහා ගිහින් Kanab නගරය පහුකරලා Page නගරයට අද දවසෙ යන්නයි අපේ බලාපොරොත්තුව.




  අතරමග භූ විෂමතාවය වෙනස් වෙන්නෙ පුදුම විදිහට. පාට පාට කදු, පස් ගොඩවල් එක එක රටා මවනවා. ඩෑෂ් බෝඩ් කැමරාව රූප එකතු කරනවා. අපි පාර අයිනේ වාහන නවත්වන්න සකස් කල නැවතුමක වාහනය නතර කලා. කව්බෝයි චිත්‍රපට වල පසුතල මගේ සිහියට එනවා. බොහෝ චිත්‍රපට Grand canyon වල රූපගත කරලා තියෙනවා. තරමක දිගු රථ ධාවනයකට පස්සෙ ගුලි ගැහිලා තිබ්බ කකුල් දෙකට නිදහසක් දෙන්න මේ වගේ පොඩි විරාමයක් හොදයි. කට්ටියම ආදී වාසීන් සැමරුම් විකුණන තාවකාලික මඩු අද්දරට ගියා. භයානක සිහින සගවා තබන බව කියන Dream Catcher එකක් අපේ සිහිවටන ගොන්නට මිලට ගත්තා. ඔබට පෙන්වන්න සේයාරූ කිහිපයකුත් ගත්තා.



අපි පහුකරන බොහෝ ප්‍රදේශ කාන්තාර, ලදු කැලා, මිනිස් පුළුටක්වත් පේන්න නැහැ. අත්භූත අත්හදා බැලීම් කරන Area 51 වගේ ප්‍රදේශ මේ පැත්තෙ තියෙන්නෙ ඒ හින්ද වෙන්න ඇති. වතාවක් අපි ලොකු විලක් වගේ එකක් ඈතට දැක්කා. ළගට ගියාමයි දැක්කෙ සුවිසල් සුර්යකෝෂ ගොවිපොලක්. පැය 5-6 ක ගමනකට පස්සෙ අපි නැවතුනේ Glen Canyon වේල්ල ලග .වෙලාව වැඩිපුර තියෙනවා නම් ඔබට Wahweap Overlook සහ Glen Canyon dam overlook වල නැවතිලා අසිරිය විදින්නත් පුළුවන්.

Glen Canyon Dam

1956-66 කාලයේදී ඉදිවුණු මේ දැවැන්ත කොන්ක්‍රීට් වේල්ල තිබෙන්නේ Page නගරය පේන දුරින්. අඩි 710 ක් උස මේ වේල්ල අක්කර අඩි මිලියන 27 ක Lake Powellජලාශය නිර්මාණය කරනවා. කොලරාඩෝ ගගේ විශාල ජල කදක් රදවා ගන්නා මේ ජලාශය නම් වුනේ භූ විද්‍යාඥ John Wesley Powell නමින්.





නියග කාලවලදී පහල නිම්නයේ ජනපදවලට ජලය සුරක්ෂිත කරන මේ ජලාශය වසරකට කිලෝවොට් බිලියන 4 ක ජල විදුලියක් උත්පාදනය කරනවා. Carl Hayden Visitor Centre එක කුඩා දරුවන්ට හොද අධ්‍යාපනික වටිනාකමක් තියෙන තැනක්. ඔබට අවශ්‍ය නම් විදුලි බලාගාරයේ සංචාරයකට යන්නත් පුළුවන් .ඒ අද්දරම තියෙන පාලමත් ලස්සන දසුන් මවන තැනක්. දැඩි සුළග සහ ආරක්ෂාව සදහා පාලම දෙපස දැල් ගසා තිබුණත් කැමරාව හෝ ජංගම දුරකථනය භාවිතා කර සේයාරූ ගන්නට කුඩා කවුළු කීපයක් තබා තිබෙනවා. 

ගමන් විඩාවත් එක්ක අපි ගිහින් Page නගරයේ කලින් වෙන්කරවා ගෙන තිබුණු නවාතැනේ නතර වුණා Page කුඩා නගරයක් හින්ද මේ නවාතැන් කලින්ම වෙන්කරවා ගන්න එක හොදයි. පහුවදා උදේ පාන්දරින්ම නැගිටින්න ඕන හින්ද අපි එදා ටිකක් කලින් නිදාගත්තා.

Antelope Canyon

අපි උදේ පාන්දරින්ම නැගිට්ටෙ Antelope Canyon එකට යන්න. අපේ චාරිකාව තිබ්බෙ ඉර උදාවත් එක්ක උදේ 6.45 ට. අපි ගියේ Lower Antelope canyon කියන කොටසටයි. Navajo ගෝත්‍රික කණ්ඩායම් විසින් මාර්ගෝපදේශක සංචාර සංවිධානය කර ඇති මෙය කොටස් 2 කින් යුක්තයි. ඒ Upper Antelope canyon ( The Crack), Lower antelope canyon ( The corkscrew ) විදිහට. Navajo Sandstone වසර මිලියන ගණනක් තිස්සේ ගංවතුර සහ වැහිවතුර නිසා ඛාදනය වීමෙන් තමයි මේ canyon හැදිලා තියෙන්නෙ. බලන්න ලස්සනයි.



ටිකක් අවදානම් ගමනක් වන මෙහිදී පඩිපෙල නගින්න බහින්න, කුඩා ඉඩ අතරින් රිංගා යන්න වෙනවා. ඒත් ඉර එළිය වැටිලා එක එක හැඩතල, පාට මවනකොට අර අමාරුකම් මග ඇරිලා මෙච්චර ලස්සන තැන් ලෝකෙ තියෙනවනෙ කියල හිතනවා. මේ ගමන ඔවුන් යන්නෙ 20 ක විතර කණ්ඩායමක්. අපව කැදවාගෙන ගිය තරුණයා අළුත් තාක්ෂණය ගැන යාවත් කාලීන වූ කෙනෙක් නිසා හරිම පැහැපත්, දර්ශණීය රූප ගොන්නක් ගන්න ඔහුගෙන් ලැබුණු උදව්ව හරි ඉහලයි. පැයකින් විතර චාරිකාව ඉවර වුණා. වැඩියෙ සෙනග පිරෙන්න කලින් ඒ ලගම තියෙන Horseshoe Bend බලන්න ගියේ එතකොට හිතේ හැටියට ෆොටෝ ගන්න පුළුවන් හින්ද.

Horseshoe Bend

Page නගරයට කිලෝමීටර් 6 ක් තරම් දුරින් තියෙන මේ මනරම් භූ පිහිටීම නම් අත අරින්න එපා .අශ්ව ලාඩමක හැඩයේ දැඩි පර්වත කුට්ටියක් වටේ කොලරාඩෝ ගග ගලා යාමේදී තමයි මෙතැන නිර්මාණය වෙන්නේ. එය බලන්නට ඉදිකර ඇති පරිශ්‍රය ජීවිතයේ ඔබට මතක හිටින සේයා සිහිවටන ඉතුරු කරනවා සිකුරුයි. සමහරු නම් කියන්නේ හෙවනැලි නොවැටෙන මධ්‍යහානයට මෙය බලන්න කියලයි. හැබැයි අපි ගිය අගෝස්තු මාසෙ නම් දවල් වෙනකොට දරාගන්න බැරි තරමේ රස්නයක් තියෙන හින්ද අපි උදෙන්ම ගියේ විඩාව අඩුකරන්නත් එක්ක. හැබැයි මට නම් හිතුනෙ ෆොටෝ ගන්න වැඩියෙ හොද උදේ හරි හවස හරි කියලයි.

අපි ආයෙමත් නවාතැනට ගිහින් කෑම කාලා ගමන පටන්ගත්තා. අපේ බලාපොරොත්තුව Grand Canyon South Rim එකට යන්නයි. ඒත් ඔබ කැමති නම්, වෙලාව තියෙනවා නම් ගොඩ වැදෙන්නට පුළුවන් North Rim එකට යන පාර හමුවන්නේ මේ ගමන අතරෙදි. දින 7 ක් වලංගු Grand canyon park vehicle pass එකක් ගත්තම ඔබට තිබෙන වෙලාව අනුව ගොඩක් දේ බලන්න පුළුවන්.

ඔබේ ඉල්ලීම් සහ තොරතුරු සදහා අළුත් විද්‍යුත් ලිපිනයක් පටන් ගත්තා. dasatha.sancharayakamathakaya@gmail.com විස්තර සදහා ලියන්න. ඉඩ ලැබෙන පරිදි පිළිතුරු ලියන්නම්

සටහන අනුරුද්ධ වැලිගමගේ

සේයාරූ -  හෙසදී වැලිගමගේ.
                     සහ  අන්තර්ජාලයෙන්  Google Images,  සියළු හිමිකම් මුල් හිමිකරුවන් සතුයි




මීළග කලාපයෙන් Dessert View වල ඉදන් Hermits Rest දක්වා Grand Canyon එක දිගේ ගමනක් යමු.

කැනඩාවේ මාසිකව පලවන දසත පුවත්පතේ 2019 ජුනි  කලාපයේ පලවිය.

විශේෂ ස්තූතිය දසත සංස්කාරිකා චමරි අබේසිංහ මහත්මියට