ලීනා ද සිල්වා රංගන වේදිනියගේ මතක

ලියනගේ දොන් ලීනා පියසීලි ද සිල්වා , අප බොහෝ දෙනෙක් හදුනන්නේ ලීනා ද සිල්වා යන නමින්. ටොරොන්ටෝවට  නුදුරින් පිකරින් ප්‍රදේශයේදී පසුගිය දා අප අතරින් වෙන් වුණු ඇය ටොරොන්ටෝව අවට විවිධ සමාජ කටයුතුවලදී ඔබ නිතර හමුවුණු  චරිතයක්.

දොන් සයිමන් ද සිල්වා මහතාට සහ ඇලිස්  සිල්වා මහත්මියට දාව 1936 ඔක්තෝබර් තිස් වැනිදා , කොලඹ මාලිගාකන්ද ප්‍රදේශයේදී උපත ලද ලීනා ද සිල්වා දැරිය , කොලඹ ආනන්ද බාලිකා විද්‍යාලයෙන් තම  අධ්‍යාපන කටයුතු සම්පුර්ණ කළා.  පාසැල් කාලයේ සිටම විවිධ රංගන කාර්යයන්ගේ නිරත වූ ඇය,  ශේෂා පලිහක්කාර මහතාගේ  නැටුම් කණ්ඩායමේ සාමාජිකාවක් සිටියදී 1954 වසරේ තිරගත වූ  අහංකාර ස්ත්‍රී චිත්‍රපටයට රංගනයෙන් දායක වන විට පාසැල් යන නම වන ශ්‍රේණියේ ශිෂ්‍යාවක්.

ලීනා ද සිල්වා රංගන වේදිනිය 1956 දී සුරතලී චිත්‍රපටයේ ප්‍රධාන නිළියගේ චරිතය රඟපාමින්  ප්‍රධාන සිංහල චිත්‍රපට රංගන ධාරාවට එකතු වුණා.  1958දී සොහොයුරෝ සහ සුනිතා, 1960 දී සුන්දර බිරිඳ සහ නළඟන, 1964 දී සුළලිත සෝභිනී සහ සුජාගේ රහස,1967දී රන් රස චිත්‍රපට බොහෝ ප්‍රේක්ෂක ආදරය දිනාගත් නිර්මාණ කිහිපයක්. අහංකාර ස්ත්‍රී චිත්‍රපටය දී ඇතිවූ දැනහැඳුනුම්කමක් මත 1960 දී ප්‍රවීණ නළු රවීන්ද්‍ර රූපසේන මහතා සමග විවාහ වූ ඇය කලක් සිනමා රංග කාරයයෙන් ඈත් වී සිටියා.

1980දී යලිත් ඇය රංගනයට පිවිසියේ සුමිත්‍රා පීරිස් මහත්මියගේ ගඟ අද්දර චිත්‍රපටය තුලින් . 1981 දී  වාලම්පුරි,  ආරාධනා සහ සාරංගා චිත්‍රපටවලත් 1982 දී කැලේ මල්,  කිරි සුවද,  මලට නොඑන බඹරු , පාරමිතා , යහළු යෙහෙළි නිර්මාණවලටත් රංගනයෙන් දායක වූ ඇය , 1983දී කලියුගය සහ සමනල සිහින,  1984 දී  හිතවතිය,  1985දී ආදර කථාව , කිරි මදු වැල් , වාසිටි කෙල්ල,  1986දී පෙරළිකාරයෝ, දුෂ්‍යන්ති , කොටි වලිගය ,  සිංහ පැටව්, දිනුම,  1988 දී   චණ්ඩින්ගෙත්  චන්ඩියා,  1989 දී සෙබලියෝ,  සිරි මැදුර , බදුලු කෝච්චිය, 1990 දී තණ්හා ආශා,  වීර උදාර,  1991දී රජකෙල්ලෝ සහ රජදරුවෝ චිත්‍රපටවලත් ප්‍රබල රංගනයන් ඉදිරිපත් කළා. 1994දී සුජාතා , 1995දී අවරගිර,  1996 දී සීමා පවුරු, 2000 දී   අනුරාගයේ අනන්තය සහ 2001 දී  පොරොන්දුව යන චිත්‍රපට වලට රංගනයෙන් දායක වූ ඇය කැනඩාවට සංක්‍රමණය වූ පසුව විශ්‍රාම ලබා කාලය ගත කළා .

 සිනමාවේදී විවිධ චරිත රඟපාමින් ගෞරවනීය චරිතයක් ලෙස සමාජයේ  බැබළුණු ඇය නිළිකම  ආභරණයක් කර නොගෙන ඉතා නිහතමානී ලෙස  ජීවත් වූ කාන්තාවකි. ටොරොන්ටෝව අවට  බොහෝ දෙනකුට නිතරම සිනහව පුරවාගත් ඇය ආදරණීය ලීනා ඇන්ටි වූයේ එනිසාය.  ජීවිතයේ  අසූ හත් වන සැතපුම් කණුව පසුකර අප අතරින් වියෝ වූ ලීනා  ද සිල්වා රංගනවේදිණියට රූපණ කණ්ඩායමේ  ප්‍රණාමය මෙසේ පලකර සිටිමු.

2024 මාර්තු  30 වැනිදා රූපණ අන්තර්ජාල රූපවාහිනිය තුලින් වෙබ් ගත වුවකි.

https://rupane.com/2024/03/30/rupane-episode-393-march-30-2024/

*********************************************************************************

ඉදිරිපත් කිරීම  - සංජීව අබේරත්න 

පසුබිම් කථනය - මංජුලා වික්‍රමරත්න

සම්පත් දායකත්වය -   

ප්‍රවීණ රංගවේදී  අජිත් ජිනදාස මහතා 

නැසීගිය ලීනා ද සිල්වා රංගවේදිනිය ගේ  පුතු 

 බිමල් රූපසේන මහතා 

නැසීගිය ලීනා ද සිල්වා රංගවේදිනිය ගේ  දියණිය 

පුර්ණා රූපසේන මහත්මිය 

දර්ශන අනුග්‍රහය - හරේන් නාගොඩවිතාන මහතා 

                               තිස්ස නාගොඩවිතාන චිත්‍රපට සමාගම 

සංකල්පය සහ  නිෂ්පාදනය - අනුරුද්ධ වැලිගමගේ

විධායක නිෂ්පාදනය - වීරා ෆොන්සේකා

ඔෂවා නගරයේ රූපණ මැදිරියේ කෙරුණු පටිගත කිරීමකි.

***********************************************************************************

සේයාරූ -  අන්තර්ජාලයෙන්  Google Images

               සියළු හිමිකම් මුල් හිමිකරුවන් සතුයි.

මේ සටහන ගැන ඔබේ අදහස් පහතින් ලියන්න. ඔබේ ගුණ දොස් මගේ ඉදිරි නිරමාණ එළිය  කරාවි.